प्रतिश्पर्धी बाइडेन र उत्तर कोरियाका नेता किमद्धारा ट्रम्प दम्पत्तिको स्वास्थ्य लाभको कामना

प्रतिश्पर्धी बाइडेन र उत्तर कोरियाका नेता किमद्धारा ट्रम्प दम्पत्तिको स्वास्थ्य लाभको कामना

वासिङ्टन, १७ असोज

कोरोनाभाइरसबाट सङ्क्रमित हुनुभएका अमेरिकी राष्ट्रपति राष्ट्रपति डोनाल्ड ट्रम्पलाई उहाँका प्रतिश्पर्धी जोए बाइडेनले सिघ्र स्वास्थ्य लाभको कामना गर्नुभएको छ । उहाँले ट्रम्प पत्नी मेलानिया ट्रम्पसमेत सङ्क्रमित भएकोमा दुवै जनाको सिघ्र स्वास्थ्य लाभको कामना गर्नु भएको हो ।

अहिले ७४ बर्ष पुग्नु भएका राष्ट्रपति ट्रम्प र ५० बर्षिया उहाँकी पत्नी मेलानिया शुक्रबार कोरोनाभाइरसबाट सङ्क्रमित हुनुभएको हो । उहाँले सामाजिक सञ्जालमा लेख्नुभएको छ, “ट्रम्प दम्पत्तिको सिघ्र स्वास्थ्य लाभका लागि हामीले निरन्तर प्रार्थना गरिरने छौँ ।” त्यसैगरी पूर्व राष्ट्रपति बाराक ओबामाले पनि ट्रम्प दम्पत्तिको स्वास्थ्य लाभको कामना गर्नुभएको छ । उहाँले ट्रम्प दम्पत्तिसँगै कोरोनाभाइरसबाट सङ्क्रमित सवैको स्वास्थ्य लाभको कामना गर्नुभएको छ । अमेरिकामा अहिले ७३ लाख ३२ हजार १९ जना सङ्क्रमित भएका छन् भने दुई लाख आठ हजार ६९३ जनाको मृत्यु भएको छ ।

यो दुवै तथ्यांक देश अनुसार हेर्दा विश्वभरी कै सवैभन्दा धेरै हो । त्यसैगरी पूर्व राष्ट्रपति विल क्लिन्टन, ट्रम्पसँगै राष्ट्रपतिमा यसअघि प्रतिश्पर्धा गर्नुभएकी हिलारी क्लिन्टन, अहिले डेमोक्र्याटको तर्फबाट उपराष्ट्रपतिको उम्मेदवार रहनु भएकी कमला हारिसलगायतले पनि ट्रम्पको स्वास्थ्य लाभको कामना गनुभएको छ । स्वदेशी नेता बाहेक अन्य देशका पनि दर्जनौ नेताहरुले उहाँलाई सिघ्र स्वास्थ्य लाभको सन्देश पठाउनु भएको छ ।उनीहरु मध्ये उत्तर कोरियाका सर्वोच्च नेता किम जोङ अनले शनिबार पढाएको सन्देशलाई महत्वका साथ हेरिएको छ । “उहाँहरुलाई जतिसक्दो चाडो स्वास्थ्य लाभ हुनेछ भन्ने मैले विश्वास लिएको छु,” किमले सम्प्रेषण गरेको सन्देशमा उल्लेख गरिएको छ । लामो समयदेखि एक अर्कालाई मुख्य दुश्मन मान्दै आएका अमेरिका र उत्तर कोरियाका शिर्ष नेताद्धय ट्रम्प र किमबीच पटक पटक शिखर वार्ता भएका थिए ।

त्यसैले पनि उहाँहरुले एक अर्काप्रति विषेश निकटता प्रदर्शन गर्ने गर्नुभएको छ । यसअघि किम अस्वस्थ भएको खवर सार्वजनिक भएको बेला पनि ट्रम्पले तत्कालै उहाँको सिघ्र स्वास्थ्य लाभको कामना गर्नु भएको थियो । राष्ट्रपति ट्रम्प दम्पत्तिलाई शुक्रबार कोरोनाभाइरसको सङ्क्रमण पुष्टि भएपछि अस्पताल भर्ना गरिएको छ । उहाँलाई ज्वरो आउनेलगायतका कोरोनाका सामान्य लक्षणहरु देखिएपछि उहाँलाई अस्पताल भर्ना गरिएको अधिकारीहरुले जानकारी दिएका छन् । उहाँलाई शुक्रबार राती वाल्टर रिड नेस्नल सैनिक अस्पताल लगिएको हो । उहाँ बिहीबार मध्यान्ह एउटा चुनावी कार्यक्रममा सहभागी भएर फर्केपछि सङ्क्रमित हुनुभएको बताइएको छ ।-(रासस÷पिटिआइ)