कैलालीका संक्रमित युवासँगै फर्किने दाङका १० युवकको पहिचान

कैलालीका संक्रमित युवासँगै फर्किने दाङका १० युवकको पहिचान

दाङ,२३ चैत्र ।

कैलालीका कोरोना संक्रमित २१ वर्षीय युवासँगै आउने दाङका १० जना युवा भेटिएका छन् ।

संक्रमित युवासँगै आउने दाङका युवामध्ये अधिकांश घोराहीका रहेका छन् । जिल्ला प्रहरी कार्यालय दाङका अनुसार घोराही–४ का ६ जना युवा रहेका छन् ।

घोराही–४ का २२ वर्षीय दुई जना, १७ वर्षका एक जना, २६ वर्षका एक जना, २९ वर्षका एक जना र साविक सोनपुर–२ का १९ वर्षका एक जना युवा भारतको मुम्बईबाट चैत १२ गते नेपाल भित्रिएका हुन् ।

यसैगरी भारतको चेन्नईबाट आएका लमही–५ का २० वर्षीय पुरुष, भारतको केरलाबाट फर्किएका सोही ठाउँकै २५ वर्षीय पुरुष पनि संक्रमित युवासँगैको भिड गौरीफन्टामा रहेको पाइएको छ । त्यस्तै राजपुर गाँउपालिका–८ का १९ र २६ वर्षका दुई जना युवा पनि गौरीफन्टा नाकामा चैत ११ गतेको भिडमा रहेको प्रहरीले जनाएको छ ।

कोरोना संक्रमित २१ वर्षीय युवा सरकारले लकडाउन घोषणा गरेपछि भारतबाट फर्किएको थिए । चैत ११ गते नेपाल प्रवेश गर्नुपर्ने माग गर्दै गौरीफन्टामा नाराबाजीमा उत्रिएको भीडमा उनीहरु पनि सहभागी रहेको पाइएको प्रहरीले जनाएको छ । जिल्ला प्रहरी प्रमुख एसपी जनक भट्टराईले संक्रमित युवासँगै आउने १० जनाको पहिचान भइसकेको र अहिले स्थानीय तहसँग सहकार्य गरेर उनीहरुको खोजी गर्न प्रहरी परीचालन भइसकेको जानकारी दिए ।

उनीसँगै गौरीफन्टामा नाकामा रहेका ९ सय ९९ जनाले नेपाल आउन पाउनुपर्ने माग गर्दै प्रर्दशन गरेका थिए । त्यसपछि मन्त्रीपरिषद् बैठकको निर्णयपश्चात् सीमामा रोकिएका ९ सय ९९ जनालाई प्रहरीले २१ वटा बसमार्फत गन्तव्य पठाएको थियो ।