आज पनि कांग्रेसद्वारा संसद अवरुद्ध

आज पनि कांग्रेसद्वारा संसद अवरुद्ध

काठमाडौं,२४ माघ।

प्रमुख प्रतिपक्षी दल नेपाली कांग्रेसले आज पनि प्रतिनिधिसभाको बैठक अवरुद्ध गरेको छ। आफ्नो पार्टीका उपसभापति तथा सांसद विजयकुमार गच्छदारविरुद्ध अख्तियार दुरुपयोग अनुसन्धान आयोगले विशेष अदालतमा भ्रष्टाचार मुद्दा दायर गरेपछि आक्रोशित बनेको कांग्रेसले सदन अवरुद्ध गरेको हो।

२० मिनेट ढिलो गरी सुरु भएको बैठकको सुरुमै कांग्रेसका सांसदहरु आफ्नो आशनबाट उठेका थिए। त्यसपछि सभामुख अग्नि सापकोटाले कांग्रेस सांसद मीनबहादुर विश्वकर्मालाई बोल्न समय दिए । सांसद विश्वकर्माले माघको चिसोमा पनि अख्तियारको कदमले देश नै तातेको भन्दै अख्तियारले पूर्वाग्रही भएर मुद्दा चलाएको दाबी गरे।

अख्तियारले राजनीतिक प्रतिशोधका आधारमा गच्छदारमाथि मुद्दा लगाएको कांग्रेसको आरोप छ। अख्तियारको निर्णय पूर्वाग्रहपूर्ण भन्दै हिजो सदन अवरुद्ध गरेको कांग्रेसले आज पनि त्यसलाई निरन्तरता दिएको हो।

हिजो नै कांग्रेसले सरकार र अख्तियारविरुद्ध सडक आन्दोलन पनि घोषणा गरेको छ।

आशन ग्रहणका लागि सभामुखले पटक पटक आग्रह गरे पनि कांग्रेस सांसदहरु नबसेपछि बैठक आधा घण्टाका लागि स्थगित गरेका छन्।