जंगली हात्तीको आक्रमणबाट चितवनमा एक जनाको मृत्यु

चितवन , ७ मंसिर ।
जंगली हात्तीले आक्रमण गर्दा चितवनमा एकजनाको मृत्यु भएको छ । चितवन राष्ट्रिय निकुञ्जभित्र आज हात्तीले आक्रमण गर्दा राप्ती नगरपालिका वडा नम्बर १ निवासी ५५ बर्षिय सानुकाजी श्रेष्ठको मृत्यु भएको हो ।
चितवन राष्ट्रिय निकुञ्जको पूर्वी सेक्टर अन्र्तगत निकुञ्जको कोर ईलाका हर्दा दोभान नजिक श्रेष्ठलाई हात्तीले आक्रमण गरेको थियोे । श्रेष्ठ कूनै पनि किसिमको अनुमति तथा जानकारी विना नै अनाधिकृतरुपमा निकुञ्ज प्रवेश गरेको पाईएको निकुञ्जका सूचना अधिकारी लोकेन्द्र अधिकारीले जानकारी दिए ।  यससंगै चालु आर्थिक बर्षमा वन्यजन्तुको आक्रमणबाट मृत्यु हुनेको संख्या ५ पुगेको छ । उनिहरु मध्ये ३ जना बाघको आक्रमणबाट , १ जना गैँडाको आक्रमणबाट र १ जनाको जङ्गली हात्तीको आक्रमणबाट मृत्यु भएको हो । यसअघि निकुञ्जको कोर ईलाकामा घरपालुवा हात्तीको कारण राष्ट्रिय प्रकृति संरक्षण कोषका माहुतेको समेत निधन भएको थियो ।