अमेरिकामा भोकै मर्न लागेको भन्दै रुवाईकराई गर्ने नेपाली युवाको दावी झूटो

अमेरिकामा भोकै मर्न लागेको भन्दै रुवाईकराई गर्ने नेपाली युवाको दावी झूटो

एजेन्सी ,२९ चैत्र ।

अमेरिकाको भर्जिनियामा बस्दै आएको बताउने एक नेपाली युवाले  भोकभोकै मर्न लागेको भन्दै रुवाईकराई गरेको 1q1111111 अहिले सामाजिक सञ्जालहरुमा भाइरल बनेको छ ।

भर्जिनियामा हास्य कलाकार पुष्कर पन्तको घरमा  भाडामा बस्दै आएका पवन चापागाईँ नामका यी व्यक्तिको रोधन भने खासमा झूटो सावित भएको छ ।

उनी २२ महिनादेखि फेयरफ्याक्स अन्नाडेलमा पन्तको घरमा भाडामा बस्दै आएका छन् । उनले भर्जिनियाको बर्कमा रहेको सेभेन इलाभेन स्टोरमा काम गर्दै आएका छन् । पन्तका अनुसार उनी अहिले पनि नियमित काममा नै छन् ।

बिहान ५ बजेतिर काममा जाने उनी राति ८ बजेतिर आइपुग्छन् । सेभेन इलाभेन स्टोरमा काम गरिरहेका उनलाई भर्जिनिया निवासी पुरु सुवेदीले पनि उनलाई शुक्रबार विहान पनि काम गर्ने स्थानमा नै गएर भेटेको पन्तले जानकारी दिए ।

उनका अनुसार न ती युवा भोकै छन्, न काम गुमाएका नै छन्, न घरबाट निकालिएका नै छन् ।

यो भिडियोमा ती युवाले बताएका अधिकांश कुराहरु गलत छन् । उनले भिडियोमा बताएका अधिकांश कुराहरु गलत भएको तथ्य फेला परेको छ ।

खासमा यस्तो छ वास्तविकता

भिडियोमा उनले बजारमा कुनै पनि खानेकुरा नभएको भएपनि खानै नहुने, षडेगलेको र विषादी भएको कुरा बेच्न राखेको बताएका छन् ।

जुन शतप्रतिशत गलत रहेको छ । अमेरिकाको खाद्य एवं औषधि प्रशासनले कुनै पनि खानै नहुने र विषादीयुक्त खानाहरु बेच्न प्रतिबन्ध लगाएको छ ।

जनताको स्वास्थ्यमा असर गर्ने, विषादी भएका खानेकुराहरु कसैले बेचेमा उनीहरुलाई कारवाही हुन्छ र कतै संक्रमित भएका वा गलत तरिकाले लेवल लगाइएका खाद्य सामग्री बजारबाट फिर्ता लगिन्छ ।

खाद्य सामग्रीमा समस्या भएमा कसरी रिपोर्ट गर्ने यहाँ क्लिक गर्नुहोस्

त्यस्तै अमेरिकामा राष्ट्रब्यापी रुपमा खाद्य सामग्रीको अभाव भएको छैन । ग्रोसरी स्टोरदेखि डेलिभरी गर्ने रेष्टुरेण्टसम्म अत्यावश्यक बिजनेशका रुपमा खुला रहेका छन् ।

कोरोनाको महामारीको सुरुका दिनमा केही स्टोरहरुमा सामान सप्लाई कम भएको थियो । तर अहिले खाद्य सामाग्री अभाव भएको छैन ।

ती युवाले दावी गरेजस्तो भर्जिनियामा त्यस्तो समस्या कतैपनि छैन । अमेरिकामा विभिन्न सिटीले निशुल्क खानाको व्यवस्था पनि गरेका छन् । कतिपय स्थानमा विभिन्न गैरनाफामुलक संस्थाहरुले पनि यस्तो व्यवस्था गरेका छन् ।

भर्जिनियामा निशुल्क खाना कहाँ पाउने यहाँ क्लिक गर्नुहोस् ।

ती युवाले आफूलाई फेलोनी २ लागेकाले काम नपाएको बताएका छन् । तर आफूसँग नयाँ गाडी, बैंक एकाउन्ट, मोबाइल फोन र क्रेडिट कार्डहरु भएको बताएका छन् । जुन विरोधाभाषपूर्ण रहेको छ । यस्तो अपराध गरेको व्यक्तिलाई आजिवन जेल वा कम्तीमा २० बर्ष जेल र १ लाख डलरसम्म जरिवानाको व्यवस्था हुन्छ । कस्तो कस्तो अपराधलाई फेलोनी २ भनिन्छ यो सुचीमा हेर्नुहोस् ।

उनको मुद्दा चलिरहेको बताइए पनि फेलोनी २ भए नभएको स्पष्ट छैन । उनीसँगै बस्ने मान्छेले केस हालेको जनाइएको छ ।

अमेरिकामा दशौं लाख कागजपत्रविहिन रहेका छन् । कागजपत्रविहिनहरुले समेत काम गरिरहेको अवस्थामा अरुले कामै नपाउने भन्ने कुरा झूठो हो ।

कर्पोरेट र सरकारी बाहेकका अधिकांश काममा व्यक्तिको अपराधको पृष्ठभूमिसमेत जाँच हुँदैन ।

उनले आफूलाई कोरोना आउनसक्छ भनेर घरबाट निकालिएको बताएका छन् । अमेरिकामा यसरीले कसैलाई घरबाट निकाल्न पाईदैन ।

कसैले त्यस्तो गरेमा ३११ व ९११ मा फोन गरेर जानकारी दिन सकिन्छ । अमेरिकामा कोरोना प्रभावित नेपालीहरुलाई विभिन्न सामाजिक नेपाली संघ संस्थाहरुले सहयोग गरिरहेका छन् ।

भिडियोमा भनिएजस्तो सास फेरेपछि कोरोना सर्छ भनेर नेपालीहरु भाग्ने गरेको सत्य होइन ।

कुनै नेपालीलाई समस्या परेमा उनीहरुले दूतावास वा कन्सुलेटमा सम्पर्क गर्न सक्छन् । त्यसका लागि दूतावास र कन्सुलेटका ४ वटा फोनलाईन २४ सै घण्टा खुल्ला रहने गरेका छन् ।

यावत तथ्यले उनले झूट बोलेर भाइरल बनिरहेको प्रष्टिएको छ । यसले उल्टै नेपालीहरुलाई परदेशमा समेत बदनाम गराउन काम गरेको छ ।

 

 

खबरहबबाट साभार