चितवनमा सवारी दुर्घटनामा परेर कार्तिकमा १० जनाले ज्यान गुमाए, २७ गम्भिर घाइते

चितवनमा सवारी दुर्घटनामा परेर कार्तिकमा १० जनाले ज्यान गुमाए, २७ गम्भिर घाइते

चितवन,४ मंसिर।

चितवनमा कार्तिक महिनामा सवारी दुर्घटनामा परेर १० जनाले ज्यान गुमाएका छन्  ,  भने २७ जना गम्भिर घाइते भएका छन् । २७ जना सामान्य घाइते भएको ट्राफिक प्रहरी कार्यालयको तथ्यांक छ । दुर्घटनामा परी मृत्यु भएका १० जना मध्ये ९ जना पुरुष र एक जना महिला छन् ।

दशैँ र तिहार परेको कार्तिकमा ३७ वटा सवारी दुर्घटना भएका थिए । दुर्घटनामा ५९ वटा सवारी साधन संलग्न रहेको ट्राफिक प्रमुख प्रहरी निरीक्षक दयाकृष्ण भट्टले जानकारी दिए । यससँगै चालु आर्थिक बर्ष २०७७÷७८ को ४ महिनामा सवारी दुर्घटनाबाट मृत्यु हुनेको संख्या ३० पुगेको छ । गम्भिर घाइते हुनेको संख्या ८६ पुगेको छ ।

ट्राफिक प्रहरीका अनुसार साउनमा ८ जना, भदौमा ३ जना र असोजमा ९ जनाको सवारी दुर्घटनाबाट मृत्यु भएको थियो । दुर्घटनाबाट कार्तिक मसान्तसम्ममा मृत्यु भएकाहरुमा २५ जना पुरुष, २ जना महिला, १ जना बालक र २ जना बालिका छन् । यस अवधिमा जिल्लामा जम्मा १२१ वटा दुर्घटना भएका थिए । सबैभन्दा बढी दुर्घटना सवारीको तिव्र गतिका कारण रहेको भट्टले बताए ।

चालु आर्थिक बर्ष २०७७÷७८ को कार्तिक मसान्तसम्ममा ट्राफिक नियम मिच्ने ९ हजार ९ सय ५० वटा सवारी साधनलाई कारबाही गरी ८० लाख १८ हजार रुपैयाँ जरिवाना असुल गरिएको छ । तिव्र गतिका ४४८ वटा, सिट क्षमता भन्दा बढी यात्रु चढाउने ४४६ वटा, मादक पदार्थ सेवन गरेर सवारी चलाउने सय वटा, लाइसेन्स साथमा नभएका ६६७ वटा र रुट परमिट नभएको २७२ वटा सवारीलाई कारबाही गरिएको ट्राफिक कार्यालयले जानकारी दिएको छ ।