त्रिविको सबै परीक्षा स्थगित

त्रिविको सबै परीक्षा स्थगित

काठमाडौं,६ चैत्र ।

त्रिभुवन विश्वविद्यालयले शुक्रबारदेखि सञ्चालन हुने सबै परीक्षा स्थगन गर्ने निर्णय गरेको छ। त्रिवि कार्यकारी परिषद्को बैठकले अर्को सूचना जारी नहुँदासम्म सवै परीक्षा स्थगन गर्न केन्द्रीय परीक्षा सञ्चालक समिति र सम्बन्धित डीन कार्यालयलाई निर्देशन दिएको त्रिविका कार्यवाहक शिक्षाध्यक्ष प्रा.डा. शिवलाल भुसालले जानकारी दिए।

‘सरकारले नै कोभिड-१९ को सङ्क्रमण जोखिमका कारणले सबै परीक्षा स्थगन गर्ने भनेपछि हामीले पनि स्थगन गरेका हौं,’ उनले भने, ‘भोलिदेखि सञ्चालन हुने सबै परीक्षा स्थगन गरेका छौं।’ त्रिविले आज पूर्वनिर्धारित परीक्षा भने सञ्चालन गरेको थियो।

परिषद् बैठकले त्रिविअन्तर्गतका सम्पूर्ण आङ्‌गिक तथा सम्बन्धन प्राप्त क्याम्पसको पठनपाठन पनि आजदेखि चैत मसान्तसम्म बन्द गर्ने निर्णय गरेको हो। हिउँदेर वर्षे बिदा पाउने शिक्षकरकर्मचारीर विद्यार्थीलाई आगामी वर्ष बिदाबाट मिलाउने गरी निर्णय गरेको कार्यवाहक शिक्षाध्यक्ष प्रा।डा। भुसालले जानकारी दिए। त्रिविका सेवा आयोगका अन्तर्वाता र परीक्षाका कार्यक्रम सम्बन्धमा सेवा आयोगले सूचना प्रकाशित गरी जानकारी गराउने निर्णयसमेत भएको छ।

उनका अनुसार बैठकले त्रिविका नियमित प्रशासनिक कामहरु यथावत रुपमा सञ्चालन गर्ने, कार्यालयमा सावुन पानी र सेनिटाइजरको व्यवस्था गरी आवश्यक सावधानीका उपाय अपनाउनसमेत सम्बन्धित निकायलाई निर्देशन दिने, कोभिड-१९ सङ्क्रमण, रोकथाम तथा नियन्त्रण उच्चस्तरीय समन्वय समितिले २५ जनाभन्दा बढी सङ्‌ख्यामा भेला नहुने सूचना जारी गरेको हुँदा सोहीअनुसार क्याम्पसका छात्रावासमा आवश्यक व्यवस्था मिलाउन सम्बन्धित क्याम्पसलाई निर्देशन दिने निर्णय गरेको छ।

त्रिविका परीक्षा नियन्त्रण कार्यालयका परीक्षा नियन्त्रक पुष्पराज जोशीले स्थगन गरिएका परीक्षाका प्रश्नपत्र सुरक्षित राखिने बताए। उनले उपत्यकाबाहिरका क्याम्पसमा पठाइएको प्रश्नपत्र प्रहरी कार्यालयमा राखिने बताए।

त्रिविले त्रिविअन्तर्गतको स्नातकोत्तर प्रथम वर्षको आंशिक परीक्षा चैत ७ गतेदेखि, स्नातकोत्तर तह चौथो सेमेस्टरको चैत ८ गतेदेखि, स्नातकोत्तर दोस्रो सेमेस्टरको चैत २२ गतेदेखि, शिक्षा शास्त्रको एक वर्षे बिएड चैत ९ गतेदेखि, स्नातक तहको कानुन सङ्‌कायको दोस्रो तहको परीक्षा चैत १४ गतेदेखि सुरु गर्ने तालिका तय गरेको थियो। रासस