कोरोनाका बिरामीको जिम्मा सरकारले लिन्छ: स्वास्थ्यमन्त्री ढकाल

कोरोनाका बिरामीको जिम्मा सरकारले लिन्छ: स्वास्थ्यमन्त्री ढकाल

काठमाडौं,६ चैत्र ।

स्वास्थ्य तथा जनसंख्या मन्त्री भानुभक्त ढकालले कोरोनाको संक्रमण भएका सम्पूर्ण बिरामीको उपचारको जिम्मा सरकारले लिने बताएका छन्। नेपाल प्रेस काउन्सिल र स्वास्थ्य मन्त्रालयले कोरोना भाइरसका विषयमा आयोजना गरेको कार्यक्रममा मन्त्री ढकालले कोरोना लागेका सबैको उपचारको जिम्मा सरकारले लिने बताएका हुन्। उनले सबै प्रदेशमा भाइरस परीक्षणको व्यवस्था गरिने र कोरोना संक्रमण भएको पाइएमा बिरामीको जिम्मा सरकारले लिने स्पस्ट पारे।

‘रगत परीक्षण गरेर कोरोना संक्रमित हो भन्‍ने भयो भने र्‍याल, खकार परीक्षणबाट पनि पुष्टि भएमा उपचारको जिम्मा सरकारले लिन्छ,’ उनले भने। मन्त्री ढकालले निजी क्षेत्रका अस्पतालमा उपचारको व्यवस्था भए पनि पहिलो प्राथमिकता सरकारी अस्पताल नै रहेको बताए। उनले निजी अस्पतालहरुको प्रयोग विदेशी नागरिक तथा कुटनीतिक नियोग र अन्य व्यक्तिहरुको लागि गरिने बताए। प्रेस काउन्सिल नेपालका अध्यक्ष किशोर श्रेष्ठले सही सूचना प्रवाह गर्न आग्रह गरेका छन्।

आचारसंहिता उलंघन गर्ने काम नगर्न आग्रह गर्दै अध्यक्ष श्रेष्ठले कोरोना विरुद्धको लडाई आफ्नो जीजनसँग पनि जोडिएकाले गलत प्रचार नगर्न आग्रह गरे। ‘कोरोनाविरुद्धको युद्ध आफ्नै जीवनसँग जोडिएको युद्ध होु, उनले भने, ‘त्यसैले गलत प्रचार गर्दा गलत हतियारको निसाना सोझिएर आफूतिर पनि आउन सक्छ’, उनले भने।

विश्वव्यापी कोरोनाको सन्त्रास बढिरहेका बेला स्वास्थ्य मन्त्रालय र प्रेस काउन्सिल नेपालले कोरोना भाइरस संक्रमण र मिडियाको भूमिका विषयमा सचेतामूलक कार्यक्रम गरेका हुन्।