राहतका नाममा कुहिएको दाल बाँडेका कलैयाका मेयर छुटे धरौटीमा

राहतका नाममा कुहिएको दाल बाँडेका कलैयाका मेयर छुटे धरौटीमा

काठमाडौं,११ वैशाख

राहतमा कुहिएको दाल र चामल बाँडेको अभियोगमा पक्राउ परेका बाराको कलैया उपमहानगरपालिकाका मेयर राजेश राय यादव धरौटीमा रिहा भएका छन्।

मेयर यादवसहित ११ जनालाई जिल्ला प्रशासन कार्यालय बाराले दुई लाख ८१ हजार रूपैयाँ धरौटी लिएर बुधबार बेलुकी साधारण तारेखमा रिहा गरेको हो।

सोही प्रकरणमा पक्राउ परेका वीरगन्जको धनलक्ष्मी दाल मिलका संचालक तेजकरण जैन पनि यादवकै जति रकम धरौटी बुझाएर तारेखमा रिहा भएको जिल्ला प्रशासन कार्यालयले जनाएको छ।

प्रमुख जिल्ला अधिकारी रुद्रप्रसाद पण्डितको इजलासले बुधबार साँझ यादव र जैनलाई धरौटीमा छोड्ने आदेश दिएका हुन्। यस्तै, कुहिएको दाल प्रकरणमा पक्राउ परेका कलैया वडा नम्बर १ का वडाअध्यक्ष हरिओमप्रसाद साह सोनार, वडा नम्बर ७ का वडाअध्यक्ष सैफुल्लाह अन्सारी, वडा नम्बर ११ का वडाअध्यक्ष सर्ब नारायण चौधरी, वडा नम्बर १३ का वडाअध्यक्ष राजनप्रसाद कुर्मी, वडा नम्बर २६ का वडाअध्यक्ष महेश साह, वडा नम्बर २७ का वडाअध्यक्ष रियाजुल अन्सारी ६० हजार धरौटीमा रिहा भएको प्रहरीले जनाएको छ।

मेयर यादवका काकाको छोरा रवीन्द्र यादव, यादव आइस एण्ड कोल्ड स्टोरका कर्मचारीद्वय बच्चु यादव र कृष्णप्रसाद यादवलाई पनि ६० हजार धरौटीमा रिहा गरिएको प्रहरीले जनाएको छ।

कुहिएको दाल र चामल बाँड्नेविरुद्ध कालोबजारी तथा सामाजिक अपराध ऐन २०३२ अन्र्तगत जिल्ला प्रशासन कार्यालयमा मुद्दा दर्ता गरिएको थियो।