संक्रमित युवतीसँगै कतारबाट आएका तीन जनाको रिपोर्ट नेगेटिभ

संक्रमित युवतीसँगै  कतारबाट आएका तीन जनाको  रिपोर्ट नेगेटिभ

नेपालगञ्ज, १७ चैत

फ्रान्सबाट कतार हुँदै आएकी कोरोना भाइरस संक्रमित युवतीसँगै आएका बाँकेका तीन जनाको कोरोनाको नमूना परीक्षण रिपोर्ट नेगेटिभ (कोरोना नभएको) देखिएको छ।

नेपालगञ्ज उपमहानगरपालिकाले सञ्चालन गरेको क्वारेन्टाइनमा राखिएका फ्रान्सबाट आएका तीनसहित छ जनाको नमूना परीक्षणको लागि काठमाडौँ पठाइएको थियो।

टेकु अस्पतालमा परीक्षण गर्दा नेगेटिभ रिपोर्ट आएको नेपालगञ्ज उपमहानगरपालिका स्वास्थ्य शाखा संयोजक रामबहादुर चन्दले जानकारी दिए।

यसअघि बाँकेबाट पहिलो चरणमा सात जनाको नमूना जाँच गर्न पठाइएकामा ती नमूना पनि नेगेटिभ नै आएका थिए।

बाँकेमा कोरोना भाइरसको आशङ्का गरिएका २३ मध्ये दुई चरणमा गरी १३ को रिपोर्ट नेगेटिभ आएको र १० जनाको रिपोर्ट आउन बाँकी चन्दले बताए। तेस्रो चरणमा शनिबार थप १० जनाको नमूना परीक्षणका लागि काठमाडौँ पठाइएको छ।