चितवनमा प्रेस चौतारी र मिडिया नेपाल मिलेर जाने सहमति
चितवन, १९ चैत ।
नेपाल पत्रकार महासंघ चितवनको निर्वाचनमा प्रेस चौतारी र मिडिया नेपालबीच गठबन्धन गर्ने निर्णय भएको छ । बिहीबार दुई संगठनबीच भएको बैठकबाट गठबन्धन गर्ने निर्णय भएको हो ।
महासंघको यही चैत २५ गते बुधबार हुने निर्वाचनमा पत्रकार महासंघ चितवनको संस्थागत विकास, पत्रकारहरुको क्षमता अभिवृद्धी र पेशागत सुरक्षाप्रति प्रतिबद्ध रहने दुई संगठनहरुले निकालेको संयुक्त विज्ञप्तीमा जनाएका छन् । सहमतिपत्रमा प्रेस चौतारीको तर्फबाट अध्यक्ष सुवास पण्डित र मिडिया नेपालको तर्फबाट अध्यक्ष समीक्षा पुरीले हस्ताक्षर गरेका छन् । विज्ञप्तीमा चितवनका अन्य पत्रकारिता क्षेत्रसंग सम्बन्धित विभिन्न पेशागत संघ–संगठनहरुलाई महासंघको आगामी नेतृत्व आम सहमतिका साथ सम्पन्न गर्न पनि अपिल गरिएको छ।
सहमतिअनुसार पत्रकार महासंघमा मिडिया नेपालले दुई जना कार्यसमिति सदस्य पाउने भएको छ । मिडिया नेपालले पाएको दुई सदस्यमा मिडिया नेपाल चितवनकी अध्यक्ष समीक्षा पुरी र उपाध्यक्ष तिलक पौडेललाई पठाइने केन्द्रीय सदस्य राजेन्द्र कार्कीले जानकारी दिए ।
उता प्रेस चौतारी चितवनले भने उम्मेदवार टुंगो लगाएको छैन । चौतारीले केही दिन अगाडि वृहत जिल्ला भेला एवं वनभोज कार्यक्रम गरेर पत्रकार महासंघको निर्वाचनमा तिलक रिमाललाई अध्यक्षमा अघि सारेको भए पनि अन्य पदमा कसलाई पठाउने भन्ने बारे छलफल भइरहेको जनाएको छ । पत्रकार महासंघ चितवनको १९ सदस्यीय कार्यसमिति रहनेछ ।