अमेरिकी संसदमा भएको आक्रमणको विश्वभरका नेताहरुले गरे निन्दा, ‘प्रजातन्त्रमाथिको हमला’
काठमाडौं : अमेरिकी संसदमा भएको आक्रमणको विश्वभरका नेताहरुले निन्दा गरेका छन् । बेलायती प्रधानमन्त्री बोरिस जोनसनले घटनालाई लज्जाजनक दृश्य भन्दै शान्तिपूर्ण र व्यवस्थित शक्ति हस्तान्तरणका लागि डोनाल्ड ट्रम्पलाई आग्रह गरेका छन् । फ्रेन्च राष्ट्रपति इम्यानुएल म्यांक्रोनले अमेरिकी चरित्रसँग अमिल्दो व्यवहार देखिएको प्रतिक्रिया दिएका छन् । क्यानाडाका प्रधानमन्त्री जस्टिन ट्रुडोले घटनालाई प्रजातन्त्रमाथिको हमला भन्दै त्यसबाट क्यानेडियालीहरू विक्षिप्त भएको उल्लेख गरेका छन् ।
त्यस्तै आयरल्यान्डका विदेशमन्त्री साइमन कोभेनीले उक्त घटनालाई पदमा रहेका राष्ट्रपति र उनका समर्थकद्वारा जानीबुझीकनै गरिएको लोकतन्त्रमाथिको आक्रमण भनेका छन । नेटोका महासचिवले घटना स्तब्ध पार्ने खालको भएको जनाएका छन् ।
यस्तै संयुक्त राष्ट्रसंघका महासचिव एन्टोनियो गुटेरसले प्रजातान्त्रिक प्रक्रियाको सम्मान हुनुपर्ने बताएका छन् । युरोपेली संघका विदेश मामिला प्रमुख जोसेफ बोरेलले विश्वको नजरमा अमेरिकी लोकतन्त्र घेराबन्दीमा परेको देखिएको जनाएका छन् ।
अमेरिकी राष्ट्रपति निर्वाचित जो बाइडनले अमेरिकी लोकतन्त्रमाथि नियोजित आक्रमण गरिएको बताएका छन् । उनले अमेरिकालाई विश्वले हेरिरहेको बताउँदै त्यसले आफूलाई स्तब्ध पारेको भन्दै घटनालाई देशद्रोहको नजिकको गतिविधि भनेका छन् ।
राष्ट्रपति ट्रम्पले चाहिँ समर्थकहरूलाई शान्ति बनाइराख्न आग्रह गरेका छन् । उपराष्ट्रपति माइक पेन्सले हिंसाको कहिल्यै जित नहुने भन्दै प्रदर्शनको निन्दा गरेका छन् ।
अमेरिकाका पूर्वराष्ट्रपतिले पनि घटनाको निन्दा गरेका छन् । बाराक ओबामाले घटनालाई देशको लागि ठूलो अनादर भएको र देशको लज्जा भएको दिनको रूपमा सम्झिने बताएका छन् । बिल क्लिन्टनले जर्वजस्ती गलत सूचना फैल्याएर गरिएको आक्रमणको संज्ञा दिएका छन् ।
यस्तै जर्ज डब्ल्यु बुसले लापरवाह राजनीतिज्ञको व्यवहारबाट मञ्चन भएको घटना भनेका छन् । आक्रमणको घटनापछि ह्वाइटहाउसका केही कर्मचारीले राजीनामा समेत दिएका छन् ।