कोरोना संक्रमणका कारण यो साता विदेशमा दुई नेपालीको निधन
काठमाडौं,२३ फागुन।
कोरोना भाइरस (कोभिड–१९) का कारण विदेशमा यो साता थप २ जना नेपालीको मृत्यु भएको छ।
गैरआवासीय नेपाली संघअन्तर्गतको स्वास्थ्य समितिका संयोजक सन्जिब सापकोटाका अनुसार यो साता दुवै जनाको मृत्यु बेलायतमा भएको हो।
शनिबार साँझसम्म कोरोना संक्रमणका कारण विदेशमा मृत्यु हुने नेपालीको संख्या ३ सय ४१ पुगेको छ। हालसम्म नेपाल बाहेक विश्वका २१ देशमा नेपालीको कोरोना संक्रमणले मृत्यु भएको छ।
हालसम्म विभिन्न ५३ देशमा रहेका नेपालीहरुमा कोरोना संक्रमण भएको पाइएको छ।
संघका अनुसार गत वर्षदेखि विश्वव्यापी रुपमा फैलिएको कोरोना भाइरसका कारण हालसम्म सबैभन्दा बढी साउदी अरबमा ८८ जना, बेलायतमा ८६ जना र युनाइटेड अरब इमिरेट्स (यूएई) मा ५० जना नेपालीको मृत्यु भएको छ ।
शनिबार साँझसम्म विभिन्न मुलुकका ६२ हजार ९ सय ८१ जना नेपालीमा कोरोना संक्रमण पुष्टि भएको छ। तीमध्ये ६० हजार ६ सय २८ जना कोरोना संक्रमण मुक्त भएका छन्। संक्रमणमुक्त हुने दर ९६ दशमलव ३ प्रतिशत रहेको छ।
संघको स्वास्थ्य समितिका अनुसार यो साता स्वीडेन, मलेसिया, युएई र पोर्चुगलमा रहेका थप नेपालीहरुमा कोरोना संक्रमण देखिएको छ।
यस्तै, कोरोना भाइरसका कारण नेपालमा ३ हजार १० जनाको मृत्यु भइसकेको छ। नेपालमा कोरोना भाइरसबाट संक्रमण हुनेको संख्या दुई लाख ७४ हजार छ सय आठ रहेको छ। संक्रमितमध्ये दुई लाख ७० हजार सात सय ७७ जना अर्थात ९८ दशमलव ६ प्रतिशत कोरोनाबाट मुक्त भएका छन्।