अनुदानको दुई किलो चिनी किन्न दुई घण्टा लाइन

चितवन, ३० जेठ ।
सरकारले साल्ट ट्रेडिङमार्फत अनुदानमा उपलब्ध गराएको दुई किलो चिनीसहित नुन तथा पिठो खरिदका लागि उपभोक्ताहरु लामो समयसम्म लाइन बस्नुपर्ने अवस्था आएको छ ।
सरकारका अर्थमन्त्री विष्णु पौडेलले जेठ १५ गते बजेट भाषणमा निषेधाज्ञा अवधिभर नागरिकलाई अनुदानमा खाद्यान्न उपलब्ध गराउने बताएपछि चितवनमा साल्ट ट्रेडिङ कर्पोरेसन मार्फत अनुदानको सामान बिक्री गरिएको छ । अनुदानको दुई किलो चिनी, दुई किलो नुन, दुइ किलो पिठो र एक लिटर भटमासको तेल लिनका लागि उपभोक्तालाई दुई घण्टासम्म लाइनमा बस्नुपर्ने बाध्यता छ । बिहान ७ बजेदेखि साल्ट ट्रेडिङको बिक्री डिपो खुल्ने भए पनि उपभोक्ताहरु ६ बजेदेखि नै लाइनमा बस्ने गरेका छन् ।
साल्ट ट्रेडिङ नारायणगढका प्रमुख बुद्धिविनोद दाहालले हप्तामा तीन दिन मात्रै अनुदानको सामान बिक्री गर्ने गरिएको बताए । दाहालले आइतबार, मङ्गलबार र बिहीबार बिहान ७ देखि ९ बजेसम्म मात्रै उपभोक्तालाई अनुदानको सामान बिक्री गरिएको बताए । उनका अनुसार ९ बजेसम्म साल्ट ट्रेडिङको गेट भित्र प्रवेश गरेका उपभोक्ताले अनुदानको सामान खरिद गर्न पाउँछन् ।
चितवनमा जेठ २४ गतेदेखि अनुदानको सामग्री बिक्री वितरण शुरु गरिएको भन्दै दाहालले निषेधाज्ञा अवधिभर अनुदानको सामग्री बिक्री गरिने बताए । उपभोक्तालाई साल्ट ट्रेडिङबाट अनुदानको चिनी ६३ रुपैयाँ २० पैसा प्रतिकिलो, पिठो ४४ रुपैयाँ प्रतिकिलो, नुन १६ रुपैयाँ प्रतिकिलो र भटमासको तेल १८८ रुपैयाँ प्रतिलिटरका दरले बिक्री गरिएको दाहालको भनाइ छ । अनुदानमा उपलब्ध खाद्यान्न लिनका लागि उपभोक्ताले नागरिकताको फोटोकपी सहित परिवारको नाम उल्लेख दाहालले बताए ।
साल्ट ट्रेडिङले पाँच जनाको परिवारलाई एक महिना पुग्ने गरी मात्रै अनुदानको सामान उपलब्ध गराएको दाहालले बताउनुभयो । साल्ट ट्रेडिङबाट अनुदानको सामान खरिदका लागि दैनिक दुई सय जनाको हाराहारीमा उपभोक्ता आउने गरेका दाहालको भनाइ छ । यहाँबाट अनुदानको सामग्रीबाहेक अन्य खाद्यान्न समेत बिक्री वितरण हुने गरेको छ ।