शनिबारदेखि मुक्तिनाथ मन्दिर बन्द हुने

जोमसोम,८ वैशाख  ।

हिमाली जिल्ला मुस्ताङको वारागुङ मुक्तिक्षेत्र—१ मा अवस्थित प्रसिद्ध धार्मिक स्थल मुक्तिनाथ मन्दिर शनिबारदेखि बन्द हुने भएको छ। कोभिड—१९ संकट व्यवस्थापन केन्द्र(सीसीएमसी) मुस्ताङको बैशाख ८ गते बुधबार बसेको बैठकले मुक्तिनाथ मन्दिर बन्द गर्ने निर्णय गरेको हो।

मुस्ताङका निमित्त प्रमुख जिल्ला अधिकारी जगदीश अर्यालको अध्यक्षतामा बसेको जिल्ला सीसीएमसीको बैठकले हिमाली जिल्ला मुस्ताङमा कोभिड—१९ को जोखिम बढ्नसक्ने सम्भावना भएकाले मुक्तिनाथ मन्दिरसहित जिल्लाका मठ मन्दिर, गुम्बा र चर्च लगायतका धार्मिक स्थलमा गरिने नियमित नृत्य पुजा,ध्यान र प्रार्थना बाहेक अन्य गतिविधि सञ्चालन गर्न शनिबारदेखि बैशाख मसान्तसम्म बन्द गर्ने निर्णय भएको मुस्ताङका निमित्त प्रमुख जिल्ला अधिकारी जगदी अर्यालले जानकारी दिए।

गण्डकी प्रदेशका सांसद महेन्द्रबहादुर थकालीको विशेष उपस्थितिमा जिल्ला स्वास्थ्य कार्यालय, अन्नपूर्ण संरक्षणक्षेत्र आयोजना (एक्याप), जिसस मुस्ताङ, जिल्ला अस्पताल जोमसोम, तीनवटै सुरक्षा निकायका प्रमुख र पत्रकार लगायतको उपस्थिति भएको जिल्ला सीसीएमसीको बैठकले ४ बुँदे निर्णय गरेको छ।

सीसीएमसीको बैठकले यसअघि चैत्र १२ गते बसेको सीसीएमसीको निर्णय बमोजिम म्याग्दी र मुस्ताङको सीमावर्तीक्षेत्र घासा र जोमसोम विमानस्थलमा सञ्चालन भएको हेल्थ डेस्कलाई पूनः निरन्तरता दिने निर्णय गरेको छ। यस्तै सोही बैठकको निर्णय अनुसार मुस्ताङका ५ वटै स्थानीय तहमा क्वारेन्टाइन र आइसोलेसन कक्ष उपलब्ध गराउन ५ वटै स्थानीय तहसँग समन्वय गर्ने जनाइएको छ।

सीसीएमसी मुस्ताङले नेपाल सरकार मन्त्रिपरिषदको बैठक गत बैशाख ६ गते कोभिड—१९ रोकथाम तथा नियन्त्रणका लागि गरिएको निर्णयलाई तत्काल कार्यान्वयनका लागि जिल्लाका स्थानीय तहमा लेखी पठाउने जनाइएको छ।

समितिले नेपाल सरकारले निर्देशन गरेको कोभिड—१९ माहामारीको जोखिम नियन्त्रणका लागि अपनाइने सम्पूर्ण जनस्वास्थ्यका मापदण्ड कार्यान्वयनमा ल्याइने बताइएको छ। समितिले दुरदराजको जिल्ला मुस्ताङमा टाढा-टाढाबाट दर्शनका लागि मुक्तिनाथ आएका तिर्थालुको समस्या र कोभिडको उच्च जोखिम बढ्ने सम्भावनालाई मध्यनजर गर्दै शनिबारदेखि जिल्लाका सबै धार्मिक स्थलको औपचारिक कर्म बन्द गरिएको हो।

पछिल्लो समय नेपालमा कोभिड—१९ को दोश्रो लहर भयावह रुपमा फैलिए पनि चैते दशैं औंशीदेखि रामनवमीसम्म हजारौंको संख्यामा श्रद्धालु भक्तजन मुस्ताङ आइरहेका छन्। मुक्तिनाथमा चैते दशैँ औंशीदेखि रामनवमीसम्म करिव ५० हजार धार्मिक पर्यटक मुस्ताङ भित्रिएको अनुमान गरिएको छ। छिमेकी देश भारत लगायतका नेपालका विभिन्न जिल्लाबाट धार्मिक पर्यटक मुस्ताङ भित्रिएपछि मुस्ताङमा कोभिडको जोखिम बढेको हो।

यसअघि जिल्ला सीसीएमसी, मुक्तिनाथ विकास समिति, स्थानीय तह र स्थानीयबासी बीच मुक्तिनाथमा कोभिड—१९ रोकथाम तथा नियन्त्रणका लागि गरिएको स्वास्थ्य सुरक्षा मापदण्ड पालना नहुँदा समस्या थपिएको हो। म्याग्दी र मुस्ताङको सीमानाकाको घासा प्रहरी चेकपोष्टमा समेत कोरोना रोकथामका लागि कुनै पहल नहुँदा कोरोनामुक्त मुस्ताङमा कोभिडको जोखिम बढेको जनाइएको छ।

अन्नपूर्णपोष्टबाट साभार