खैरहनिलाई बालमैत्री नगर बनाउन गृहकार्य सुरु
चितवन बैशाख १२ –
वनको खैरहनी नगरपालिकालाई बालश्रम मुक्त तथा बालमैत्री नगर बनाउने प्रतिबद्धता जनाइएको छ । बालमैत्री नगर बनाउने विषयमा आइतबार आयोजित अन्तरक्रिया कार्यक्रम गरिएको थियो । सोही अवसरमा नगरका जनप्रतिनिधिहरुले बालमैत्री स्थानीय शासन नितिगत अवलम्बन तथा घोषणाका लागि सामुहिक प्रतिबद्धता पत्रमा हस्ताक्षर गर्दै बालमैत्री नगर बनाउने प्रतिबद्धता जनाएका हुन ।
प्रतिबद्धता पत्रमा नगर प्रमुख लालमणी चौधरी सहित वडा अध्यक्षहरु,कार्यपालिका सदस्यहरु,नगरपालिकाका कर्मचारीले हस्ताक्षर गरेका छन् । प्रतिबद्धता पत्रमा हस्ताक्षर अघि आयोजित अन्तरक्रिया कार्यक्रममा साझेदार संस्था युथ क्लब नारायणगढका रामचन्द्र आचार्यले बालमैत्री नगर बनाउन अवलम्बन गर्नु पर्ने सुचकका बारे सहजीकरण गरेका थिए ।
सहयोगी संस्था ग्लोबल फेयरनेशका रास्ट्रिय निर्देशक सुरेश पण्डितले बाल श्रमिकको अवस्था र गर्नु पर्ने कामका विषयमा अध्ययन गरेर प्रक्रिया अगाडि बढाउन आग्रह गरे । उनले प्रतिबद्धताका आधारहरु तय गरेर काम गर्न पनि सुझाब दिए । नेपालमा हाल ११ लाख बालमजदुर रहेको उल्लेख गर्दै पण्डितले राजनीतिक इच्छाशक्ति , क्षमता र श्रोतको खोजी गर्न सके बालमैत्री नगर बनाउन सहज हुने औल्याए ।
नगरपालिकाका प्रमुख प्रशासकीय अधिकृत चन्द्रकान्त न्यौपानेले जनप्रतिनिधि ,उद्योगि,ब्यबसायी लगायत सम्पुर्ण नगरबासिको साथ र सहयोग रहे बालमैत्री नगर बनाउन कठिन नहुने बताए । खैरहनी नगरपालिका प्रमुख लालमणी चौधरीको अध्यक्षतामा भएको कार्यक्रममा नगरपालिका सामाजिक बिकास समिती संयोजक समेत रहेका वडा नम्बर ७ का बडा अध्यक्ष मनेजर महतो,युथ क्लब नारायणगढका अध्यक्ष रामबाबु श्रेष्ठ ,नगरपालिका महिला तथा बालबालिका शाखा प्रमुख कृष्णकुमारी गुरुङ लगायतले मन्तव्य राखेका थिए ।
कति समयमा बालमैत्री नगर घोषणा गर्ने भन्ने विषयमा कार्यपालिका बैठकले निर्णय गर्ने छ । शाखा उपप्रमुख बिमला रानाभाटका अनुसार खैरहनी यसअघिको तथ्यांकमा ३६ जना बाल श्रमिक थिए ।
