चितवनका सबै पार्टी प्यालेस सञ्चालनमा राेक

चितवन, १४ वैशाख ।

जिल्ला प्रशासन कार्यालय चितवनले जिल्लाका सबै पार्टी प्यालेस सञ्चालनमा रोक लगाएको छ । प्रशासनले पूर्व स्वीकृति लिएर २५ जना नबढ्ने गरी कार्यक्रम सञ्चालन गर्न स्वीकृति दिएको भए पनि पछिल्लो समय स्वीकृति नै नलिइ मापदण्ड विपरित काम गरेको भन्दै स्थानीय प्रशासनले पार्टी प्यालेसहरु सञ्चालनमा रोक लगाउने निर्णय गरेको हो ।

कार्यालयले मङ्गलबार सूचना प्रकाशित गरी होटलमा समेत विवाह, व्रतबन्ध, भोजभतेर लगायतका कार्यक्रम गर्न रोक लगाएको छ । स्थानीय प्रशासनद्वारा जारी सूचनामा भनिएको छ, “कोभिड १९ सङ्क्रमण थप बढ्न सक्ने जोखिमलाई मध्यनजर गरी वैशाख १५ गतेदेखि अर्काे सूचना नभएसम्मका लागि जिल्लामा रहेका सबै पार्टी प्यालेस सञ्चालनमा रोक लगाइएको व्यहोरा सबैमा जानकारी गराईन्छ ।” सूचनामा अगाडि भनिएको छ “सूचनाको अवज्ञा हुने गरी पार्टी प्यालेस सञ्चालन गरे पार्टी प्यालेस वा होटल समेत जिम्मेवारी हुने छ ।”

कसैले अटेर गरेमा कसुरको आधारमा सङ्क्रमण रोग नियन्त्रण ऐन २०२० बमोजिम कारवाही हुने समेत सूचनामा उल्लेख छ ।