विवाह बाहिर र अघि हुने यौनसम्बन्ध अपराध हुने, एक वर्षको सजाय

विवाहपूर्व र दम्पतिबाहिर हुने यौनसम्बन्धलाई अपराध बनाउने कानुन बनाउन तयारी भइरहेको छ । विवाह बाहिर सम्पर्क कायम राख्ने मात्रै नभएर बिहे भन्दा पहिले यौनसम्पर्क राख्नेलाई सजाय हुनेछ । यस्तो कानून नेपालमा नभई इन्डोनेसियामा बन्दैछ । त्यहाँको संसदले छिट्टै एउटा कानून ल्याउन लागेको छ, जसमा विवाह बाहिर यौनसम्पर्क गर्नेलाई एक वर्षसम्मको सजाय हुनेछ । कानूनको मस्यौदामा जोडिएका इन्डोनेसियाली नेता बाम्बाङ वुरियान्टोले आगामी साताको सुरुसम्ममा यो कानून संसदबाट पारित हुने बताएका छन् ।

यदि यो कानून पारित भयो भने, इन्डोनेसियाली नागरिकहरू मात्रै नभएर विदेशीहरूमाथि पनि लागू हुनेछ । व्यभिचार अन्तर्गतको सजाय तब मात्र प्रभावकारी हुन सक्छ, जब कोही यसबारे उजुरी गर्दछ । त्यसैगरी, विवाहअघि शारीरिक सम्बन्ध बनाउन पनि प्रतिबन्ध लगाइनेछ । यदि दोषी प्रमाणित भए ६ महिनासम्म जेल सजाय हुन सक्नेछ । समाचार एजेन्सी रोयटर्सका अनुसार व्यापारीहरूले नयाँ कानूनलाई लिएर चिन्ता व्यक्त गरेका छन् । चाडपर्व र लगानीको गन्तव्यका रुपमा चिनिएको मुलुकले घाटा बेहोर्नु पर्ने व्यवसायी बताउँछन् । यसअघि सन् २०१९ मा पनि कानूनको मस्यौदा पारित गर्ने तयारी गरिएको थियो, त्यसपछि देशव्यापी प्रदर्शन भएको थियो ।