महिला स्वास्थ्य स्वयंसेविका दिवसको अवसरमा खैरहनीमा प्रशिक्षण

चितवन , १९ मंसिर । १९ औं महिला सामुदायिक स्वास्थ्य स्वयंसेविका दिवसको अवसरमा खैरहनीमा प्रशिक्षण कार्यक्रम गरिएको छ । स्वास्थ्य कार्यालय चितवन र खैरहनी नगरपालिकाको आयोजनामा महिला स्वास्थ्य स्वयंसेविका तथा स्वास्थ्यकर्मीहरुलाई विभिन्न रोगको बारेमा प्रशिक्षण दिइएको थियो ।

कार्यक्रममा स्वास्थ्य कार्यालय चितवनका भेक्टर कन्ट्रोल निरिक्षक रामकुमार के.सीले स्क्रब टाइफस , उर्मिला आचार्यले डेंगीको बारेमा र खैरहनी नगरपालिकाका स्वास्थ्य शाखा प्रूमुख निर्मल घिमिरेले जापानिज इन्सेफलाइटिस रोगको लक्षण , रोकथाम र नियन्त्रणको बारेमा प्रशिक्षण दिएका थिए । त्यस्तै नन्दकली चापागाँईले काभिड १९ रोगको लक्षण , रोकथाम र पोषणको बिषयमा प्रशिक्षण दिएकी थिइन् । कार्यक्रमका प्रमुख अतिथि खैरहनी नगरपालिकाका नगर प्रमुख शशि कुमार खनियाले समाजमा महिला स्वास्थ्य स्वयंसेविकाहरुको भूमिका महत्वपूर्ण भएकाले उहाँहरुको अति आवश्यक सेवा सुविधाको बिषयमा नगरपालिका सकारात्मक रहेको बताए । महिला स्वास्थ्य स्वयंसेविकाहरुले आधारभुत सुविधाहरु समेत नपाएको बिषयमा आफू चिन्तित रहेको भन्दै क्रमैसँगै सुविधाहरुमा नगरपालिकाले गर्न सक्ने सहयोग गर्ने नगर प्रुमखले प्रतिवद्धता व्यक्त गरे । उनले जनताको स्वास्थ्य अवस्थामा सुधार ल्याउन महिला स्वयंसेविकाहरुको भूमिक महत्वपूर्ण भएकाले सधै आफ्नो सेवामा विचलित नभई निरन्तर लागि रहन आग्रह गरे ।

स्वास्थ्य क्षेत्रमा सुधार ल्याउन नेपाल सरकारले महिला स्वास्थ्य स्वयंसेविकाहरु परिचालन गरेर स्वास्थ्य क्षेत्रमा गरेको काम सफल भएको खैरहनी नगरपालिकाकी उप प्रमुख कविता उप्रेतीले बताइन् । उच्च जन्मदर, शिशु मृत्यु दर र गर्भवती महिलाको मृत्यु दर घटाउन महिला स्वास्थ्य स्वयंसेविकाहरुको भूमिका रहेको उनले बताइन् । आफूले पनि २७ बर्ष महिला स्वयंसेविकाको रुपमा सेवा गरेकोले महिला स्वयंसेविकालाई परेको समस्याहरुको बिषयमा आफू जानकार रहेको भन्दै आवश्यक सहयोग गर्न तयार रहेको उप प्रमुख उप्रेतीले प्रतिवद्धता व्यक्त गरिन् । स्वस्थ्य कार्यालय चितवनका प्रमुख दुर्गादक्त चापागाईले स्वास्थ्य क्षेत्रमा सरकारले ल्याएको योजना महिला स्वास्थ्य स्वयंसेविकाहरुको सहयोगको कारण सफल भएको भन्दै प्रशंशा गरे । अन्य देशले समेत नेपालकोसिको गर्दै महिला स्वास्थ्य स्वयंसेविकाहरुको अवधारणा ल्याएको उनले बताए । सरकारले ल्याएको स्वास्थ्य सेवाको कार्यक्रमहरु समुदायस्तरमा जोड्न र महिला सशक्तिकरण गर्ने उदेश्यले महिला स्वास्थ्य स्वयंसेविकाको अवधारणा सुरु गरिएको उनले दावी गरे । महिला स्वास्थ्य स्वयंसेविकाहरुलाई सेवा सुविधाको बिषयमा धेरै समस्या भएकोमा अहिले स्थानिय सरकार , प्रदेश सरकारले पहिलाको तुलनामा केहि सुविधाहरु थप्दै गएको चापागाईले बताए ।