मेसी चम्किदा अर्जेन्टिना फाइनलमा, क्रोएसिया बाहिरियो

काठमाडौं, २७ मंसिर | कप्तान लियोनेल मेसीको उत्कृष्ट प्रदर्शनमा क्रोएसियालाई ३–० ले पराजित गर्दै अर्जेन्टिना कतार फिफा विश्वकप २०२२ को फाइनलमा प्रवेश गरेको छ । कतार दोहास्थित लुसेल मैदानमा कप्तान मेसीले एक गोल र एक असिस्ट गर्दा जुलियन अल्भारेजले दुई गोल गरेका थिए ।अब, आइतबार अर्जेन्टिनाले उपाधिका लागि मोरक्को र फ्रान्सको विजेतासँग फाइनल खेल्नेछ । खेल आज राति हुनेछ । यस जितसँगै अर्जेन्टिना छैटौं पटक फाइलनमा प्रवेश गरेको छ । यस अघि अर्जेन्टिना दुईपटक विश्वविजेता भएको थियो । अर्जेन्टिना अन्तिम पटक मेसीको कप्तानीमा सन् २०१४ मा फाइनल खेल्दा उपविजेता भएको हो । मेसीले ३४औं मिनेटमा जारी प्रतियोगिताको व्यक्तिगत पाँचौं गोल गर्दै अर्जेन्टिनालाई अग्रता दिलाएका थिए । प्रतियोगिताका पाँच गोलमध्ये मेसीले पेनाल्टीमा गरेको यो तेस्रो गोल हो ।

मंगलबारको गोलसँगै जारी विश्वकपको उच्च गोलकर्ताको दौडमा मेसीले फ्रान्सका किलियन एमबाप्पेसँग बराबरी गरेका छन् ।क्रोएसियाका गोलकिपर डोमिनिक लिभाकोभिचले स्ट्राइकर जुलियन अल्भारेजलाई वान भर्सेज वानको अवस्थामा लडाएपछि अर्जेन्टिनाले पेनाल्टीको मौका पाएको थियो । उनले बायाँ खुट्टाले प्रहार गरेको कडा बल विपक्षी गोलकिपरलाई कुनै मौका नदिई गोलमा परिणत भएको थियो । अर्जेन्टिनाका लागि मेसीले अग्रता दिलाएको पाँच मिनेटमै अल्भारेजले नै दोस्रो गोल गरे । काउन्टर अट्याकको मुभमा तिब्र गतिमा बल अगाडि बढाउँदै उनले पेनाल्टी बक्स भित्रबाट तीन विपक्षी रक्षकको बीचबाट गोल गरेका थिए ।अल्भारेजले व्यक्तिगत दोस्रो गोल खेलको ६९औं मिनेटमा गरेका थिए । कप्तान मेसीले बक्सभित्र मिलाएको आकर्षक बललाई अल्भारेजले सहज गोल गरेका थिए ।