अमेरिकी फोटोग्राफर कितिया पावलोस्किले खिचेको हिउँ चितुवाको फोटो ‘नक्कली’ !
काठमाडौँ १० मंसिर । अमेरिकी फोटोग्राफर कितिया पावलोस्किले नेपालको सगरमाथा क्षेत्रमा खिचेको बताइएको हिमचितुवाको फोटोले सामाजिक सञ्जालमा निकै चर्चा पाएको थियो ।
अल्पाइन इन्टरनेशनल म्यागजिन नामक फ्रान्सेली अनलाइन म्यागजिनले कितियाले सगरमाथामा खिचेको भनेर दाबी गरेको तस्बिर फोटोशप गरिएको उल्लेख गरेको छ । म्यागजिनमा प्रकाशित ‘द फेक स्नो लियोपार्ड: फोटोमोन्टेज स्प्रेड अराउन्ड द वर्ल्ड’ नामक एक लेखमा उक्त हिमचितुवाको तस्बिर फेक (नक्कली) भएको दाबी छ । हिमाल र आरोहीहरूको बारेमा लेख्ने उक्त म्यागजिनमा कितिया वास्तविक फोटोग्राफर पनि होइनन् तर उनको फोटोशप गर्ने सिप भने उत्कृष्ट रहेको उल्लेख गरेको छ ।
उनी वास्तविक फोटोग्राफर होइनन् भनेर उनको सामाजिक सञ्जालले पनि प्रमाणित गरेको छ । सामाजिक सञ्जालको यो समयमा कुनै पनि फोटोग्राफरले आफ्नो कामहरू सामाजिक सञ्जाल मार्फत देखाउन चाहन्छन् । तर कितियाको ५० हजार फलोअर्स भएको इन्स्टाग्राममा भने पाँचओटा मात्र फोटो छन्; एउटा उनको आफ्नै र बाँकी चार उनले खिचेको भनेको हिमचितुवाको फोटो ।
उनले खिचेको बताइएको हिमचितुवाको फोटोमा भने सगरमाथा क्षेत्रको स्थानहरू नै गलत छन् । साथै उनले खिचेको तस्बिरको विवरणको आधार मान्ने हो भने उनले दिएको पृष्ठभूमी र वास्तविक पृष्ठभूमी भने गलत रहेको अल्पाइनको दाबी छ ।
कितियाको तस्बिर नेपालस्थित अमेरिकी राजदुतावासको आधिकारिक फेसबुक पेजबाट समेत शेयर गरेको थियो ।
नेपालमा पनि यो तस्बिर चर्चाको विषय बनेको थियो । नेपालका सञ्चार माध्यमहरूमा यो फोटो र फोटो खिच्ने अमेरिकी फोटोग्राफरको बारेमा राम्रै चर्चा पनि भएको थियो । यति मात्र नभएर सामाजिक सञ्जालका प्रयोगकर्ताबिच अमेरिकी फोटोग्राफरले खिचेको तस्बिर मात्र शेयर गर्ने नेपाली फोटोग्राफरले नै खिचेको तस्बिरलाई भने वास्ता नगर्ने भन्ने खालका विवाद पनि उठेको थियो
