खैरहनी ५ को वडा कार्यालय भवन शिलान्यास

चितवन , ४ चैत । खैरहनी नगरपालिकाको वडा नम्बर ५ को कार्यालय भवनको आज शिलान्यास भएको छ । खैरहनी नगरपालिकाका नगर प्रमुख शशि कुमार खनियाँ , उप प्रमुख कविता उप्रेती ,प्रमुख प्रशासकिय अधिकृत पुरुषोत्तम शर्मा, वडा अध्यक्ष छत्रनाथ सुवेदीले भवनको शिलान्यास गरेका हुन् ।

६१ लाख ६ हजार रुपैयाँ लागतमा निर्माण हुने वडा कार्यालयको एकतले भवनको आज शिलान्यास गरिएको हो । प्रदेशको समपुरक बजेटमा निर्माण हुन लागेको भवनमा ५ वटा कोठा रहने छ । वडा कार्यालय भवन आउदो असार मसान्तभित्र सम्पन्न गर्ने गरि मंगल मुर्ती निर्माण सेवा प्रा.लिले सम्झौता गरेर काम सुरु गरेको खैरहनी ५ का वडा अध्यक्ष छत्रनाथ सुवेदीले जानकारी दिए ।

शिलान्यस कार्यक्रममा बोल्दै कार्यक्रमका प्रमुख अतिथि खैरहनी नगरपालिकाका प्रमुख शशि कुमार खनियाँले वडा कार्यालय भवन गुणस्तरिय रुपमा समयमै सम्पन्न गर्नुपर्नेमा जोड दिए । आम जनता सुरुमा आउने वडा कार्यालय भएकोले सहज रुपमा सेवा प्रभाव गर्न राम्रो भैतिक पुर्वाधार भएको कार्यालय आवश्यक हुने नगर प्रमुख खनियाँले बताए । नयाँ जनप्रतिनिधिहरु आउनासाथ आफ्नै भवन नभएका वडाको वडा कार्यालय भवन निर्माण गर्ने लक्ष्य अनुरुप खैरहनी ५ को वडा कार्यालय निर्माणको काम सुरु भएको उनले बताए । आफ्नै वडा कार्यालय नभएको वडा नम्बर ७ को कार्यालय भवनको लागि समेत प्रक्रिया सुरु भइसकेको उनले बताए ।

वडा नम्बर ५ को कार्यालय भवन अभावमा अहिले साविकको दुर्गा भवानी राप्रविको विद्यालय भवनबाट वडा कार्यालयको काम हुदैँ आएको छ । शिलान्यास कार्यक्रममा खैरहनीका विभिन्न वडाका वडा अध्यक्षहरु, वडा नम्बर ५ का निवर्तमान जनप्रतिनिधिहरु लगायतको उपस्थिति रहेको थियो ।