आक्रमक बन्दै खैरहनी नगरपालिका ,अटेरी गरि मापदण्ड पालना नगर्ने ४ वटा मासु पसल बन्द गर्न निर्देशन

चितवन , ३२ साउन । खैरहनी नगरपालिकाले बजार अनुगमनलाई आक्रमक रुपमा लगेको छ । खैरहनी नगरपालिकाकी उप प्रमुख तथा अनुगमन समिति संयोजक कविता उप्रेतीको नेतृत्वको टोलिले बुधबार र विहिबार करिव दुई दर्जन होटल ,मिष्ठान्न भण्डार, विद्यालयका क्यान्टिन र मासु पसलको अनुगमन गरेको छ ।

अनुगमनको क्रममा पहिलाको तुलनामा होटलहरुले सुधार गरेको पाइएको खैरहनी नगरपालिकाका प्रशासकीय अधिकृत नविनराज रुवालीले जानकारी दिए । पहिलाको तुलनामा केही सुधार गरेतापनी अझै सरसफाइ र खाद्य स्वच्छतालाई ध्यान दिदै थप सुधार गर्न निर्देशन दिइएको रुवालीले बताए । अधिकाम्स होटल व्यवसायीहरुले फ्रिजमा उचित तापक्रम कायम गर्न नसकेको ,फ्रिजको भित्री भागमा आइस जमेको जसको कारण प्रयाप्त तापक्रम नभएको भेटिएको खाद्य तथा गुण नियन्त्रण इकाई कार्यालय भरतपुरका खाद्य निरीक्षक घननाथ अधिकारीले जानकारी दिए । त्यस्तै केही होटलमा सरसफाईको कमि देखिएकोले सरसफाईमा विशेष ध्यान दिन निर्देशन दिइएको उनले बताए ।

बुधबार विभिन्न होटलहरुको अनुगमन गरेको टोलिले विहिबार खैरहनीका विद्यालय तथा कलेजको क्यान्टिन र मासु पसलहरुको अनुगमन गरेको छ । अनुगमनको क्रममा यसअघि पनि पटक पटक सरसफाईमा सुधार गर्न निर्देशन दिदा समेत अटेर गर्ने ४ वटा मासु पसल बन्द गर्न निर्देशन दिएको खैरहनी नगरपालिकाकी उपप्रमुख कविता उप्रेतीले जानकारी दिइन् । टोलिले खैरहनी ८ को चितवन मिट सप्लायर्स , बस्नेत मासु पसल , न्यु शुलभ फ्रेस हाउस र खैरहनी ६ को गुड्डु मिया फ्रेस हाउसलाई सरसफाईको मापदण्ड उचित रुपमा पालना नगर्दासम्म संचालन नगर्न निर्देशन दिएको उप प्रमुख उप्रेतीले बताइन् । अनुगमनको क्रममा व्यवसायीहरुले फ्रिजको उचित प्रयोग नगरेको , फ्रिजभित्र फोहोर भएको , उचित तापक्रम कायम नगर्दा मासु बिग्रेको भेटिएको थियो ।

आज करिव ३० किलो बिग्रेको मासु जफत गरेर नष्ट गरिएको उप प्रमुख उप्रेतीले बताइन् । मासु काट्ने स्थानमा फोहोर रहेको पसलमा टायल लगाएर उचित सरसफाईको व्यवस्था नगर्दासम्म पसल संचालन गर्न नदिइने उनले बताइन् ।

टोलिले आज सुनगाभा कलेज र ग्लो साइन एकेडेमीको क्यान्टिनको समेत अनुगमन गरेको छ । क्यान्टिनमा खानेकुराहरु छोप्न पत्रीकाको प्रयोग नगर्न निर्देशन दिएको खाद्य निरीक्षक बन्दना पन्तले जानकारी दिइन् ।