चितवन , ५ जेठ । खैरहनी नगरपालिकाको वडा नम्बर ८ का वडा अध्यक्षलाई ज्यान मार्ने धम्की आएको छ । वडा अध्यक्षलाई वडा कार्यालयमै ज्यान मार्ने धम्की आएको भन्दै वडा समितिले आपत्ति जनाएको छ ।

खैरहनी ८ का वडा अध्यक्ष शंकर कंडेललाई एक युवकले विहिवार दिउँसो वडा अध्यक्षकै कार्यकक्षमा गएर ढोका थुनेरे ज्यान मार्ने धम्की दिएको भन्दै वडा समितिले कारबाहीको माग गरेको छ । वडा समितिको आज बसेको बैठकले ति युवकलाई कानुन बमोजिम कारबाहीको लागि प्रहरीलाई अनुरोध गर्ने निर्णय गरेको खैरहनी ८ का वडा सदस्य श्याम कुमार पाठकले जानकारी दिए ।

विहिवार आफ्नो कार्यकक्षमा एक युवक आएर ढोका थुनेर आफूलाई गालीगलौच गर्दै वडा भित्रका विभिन्न भौतिक निर्माण सम्बन्धी काम मलाई किन नदिएको भन्दै ज्यान मार्ने धम्कीसहित आक्रमण प्रयास गरेकोे वडा अध्यक्ष शंकर कंडेलले बताए । त्यस लगत्तै आफूले प्रहरीलाई खबर गरेको उनले बताए ।

वडा कार्यालयमा गएर वडा अध्यक्षलाई ज्यान मार्ने धम्की दिने युवकलाई विहिवारनै नियन्त्रणमा लिएको प्रहरीले जनाएको छ । उक्त कार्यमा संलग्न रहेको भन्दै प्रहरीले खैरहनी ८ निवासी ३१ वर्षिय मिलन भण्डारीलाई नियन्त्रणमा लिएर अनुसन्धान प्रक्रिया अगाडी बढाएको जिल्ला प्रहरी कार्यालय चितवनका प्रवक्ता प्रहरी नायव उपरिक्षक विजयराज पण्डितले जानकारी दिए ।