नेपालको निर्वाचन आयोगले १२० वटा दल दर्ता निवेदन प्राप्त गरेको जानकारी

चितवन, १४ मंसिर । नेपालको निर्वाचन आयोगले आगामी २०८२ साल फागुन २१ गते हुने प्रतिनिधि सभा सदस्य निर्वाचनमा भाग लिनका लागि राजनीतिक दल दर्ता र एकल चुनाव चिह्न प्रयोग गर्न चाहने दलहरूबाट कुल १२० वटा निवेदन प्राप्त भएको जनाएको छ। आयोगले २०८२ मंसिर १४ गते जारी गरेको विज्ञप्तिमा जानकारी दिएको अनुसार, दल दर्ता गर्ने अवधि अब सकिएको छ ।

यसअघि, कात्तिक २८ गतेको आयोगको निर्णयअनुसार दल दर्ताको प्रारम्भिक अवधि मंसिर १ गतेदेखि १० गतेसम्मको लागि तोकिएको थियो। पछि, मंसिर १० को निर्णयानुसार यस अवधि थप १४ गतेसम्मका लागि लम्ब्याइएको थियो । थप गरिएको अवधिमा प्रतिनिधि सभा सदस्य निर्वाचनको प्रयोजनका लागि १२० वटा निवेदन प्राप्त भएका छन् ।

निर्वाचन आयोगले स्वीकृत कार्यतालिका अनुसार प्राप्त यी निवेदनहरूको छानबिन गरी, प्रचलित कानुनबमोजिम योग्य दललाई २०८२ साल मंसिर २० गतेसम्ममा स्वीकृति प्रदान गर्ने जानकारी दिएको छ ।