विश्वासको मत जितेपछि मन्त्रिपरिषद् विस्तार गर्ने मुख्यमन्त्रीको योजना सार्वजनिक
चितवन, १७ कार्तिक ।मधेस प्रदेशका मुख्यमन्त्री जितेन्द्र प्रसाद सोनलले प्रदेश सभाबाट विश्वासको मत प्राप्त गरेपछि मात्रै मन्त्रिपरिषद् विस्तार गर्ने तयारी गर्नु भएको छ ।
विश्वासको मत लिनुअघि मन्त्रिपरिषद् विस्तार गर्दा जनमत पार्टीभित्र विभाजनको प्रभाव बढ्ने आकलन गर्दै अहिलेका लागि तीन सदस्यीय सरकारबाटै काम अघि बढाइने भएको हो ।
सत्ता साझेदार दलहरूबिच मन्त्रालयको भागबन्डाबारे सैद्धान्तिक सहमति भइसके पनि दलहरूले आफ्ना मन्त्रीको नाम अन्तिम टुङ्गोमा नपुर्याएका कारण विस्तार स्थगित गरिएको मुख्यमन्त्री कार्यालय स्रोतले जनाएको छ ।
मुख्यमन्त्री सोनलले पद तथा गोपनीयताको शपथ ग्रहण गरेसँगै दुई जना मन्त्रीलाई शपथ दिलाउनु भएको थियो । तर, उहाँहरूलाई अहिलेसम्म जिम्मेवारी तोकिएको छैन । हाल सबै मन्त्रालयको जिम्मेवारी मुख्यमन्त्री सोनलकै काँधमा छ ।
सत्ता गठबन्धनमा सात दल सहभागी रहेका छन् । जसपाका १९, जनमत पार्टीका १३, माओवादी केन्द्रका , लोकतान्त्रिक समाजवादी पार्टी (लोसपा) का ८, नेकपा एकीकृत समाजवादीका ७, नागरिक उन्मुक्ति पार्टी र नेपाल सङ्घीय समाजवादी पार्टीका एक–एक जना सांसद छन् । स्रोतका अनुसार जसपा नेपालले चार वटा मन्त्रालय पाउनेछ । जनमत पार्टीले तीन, माओवादी केन्द्रले दुई र लोसपा तथा समाजवादी पार्टीले एक–एक मन्त्रालय पाउने सहमति भएको छ । जसपा नेपालले आफ्ना मन्त्रीहरूको नाम लगभग टुङ्गोमा पुर्याएको छ । रामअशिष यादवलाई भौतिक पूर्वाधार विकास मन्त्रालय, मनिष सुमनलाई शिक्षा तथा संस्कृति मन्त्रालय र राजु गुप्तालाई स्वास्थ्य मन्त्रालयको जिम्मेवारी दिने तयारी भएको बताइन्छ ।
चौथो मन्त्रालयमा रौतहट वा बाराबाट एक जनालाई प्रतिनिधित्व गराउने सम्भावना रहेको जसपा स्रोतको भनाइ छ ।
माओवादी केन्द्रले नयाँ अनुहारलाई सरकारमा पठाउने तयारी गरेको छ भने जनमत पार्टीले बाँकी दुई मन्त्रालयमा पुरानै अनुहार दोहोर्याउने सम्भावना रहेको बताइन्छ । लोसपा नेपालले रानी शर्मालाई पुनः मन्त्री बनाउने तयारी गरेको छ ।
मुख्यमन्त्री सोनलले विश्वासको मत कार्तिक २२ गते शनिवार लिन लाग्नु भएको छ ।
गठबन्धनका नेताहरूका अनुसार विश्वासको मत प्राप्त गरे लगत्तै २३ गते आइतबार मन्त्रिपरिषद् विस्तार गरिनेछ ।।
