एमालेले महाधिवेशन प्रतिनिधि उम्मेदवारी शुल्क एक हजारमा सीमित गर्दै १३ मंसिरभित्र चयन प्रक्रिया सक्न निर्देशन

चितवन, ०९ मंसिर ।  नेकपा एमालेले महाधिवेशन प्रतिनिधि चयनका लागि लाग्ने उम्मेदवारी शुल्कमा सीमा तोकेको छ। संगठन विभागले कुनै पनि उम्मेदवारबाट एक हजार रूपैयाँभन्दा बढी शुल्क नलिन निर्देशन दिएको छ।

केही जिल्लामा अस्वाभाविक रूपमा बढी शुल्क लिएको गुनासो आएपछि यस्तो व्यवस्था गरिएको संगठन विभागले जनाएको छ। साथै, प्रतिनिधि छनोट प्रक्रिया मंसिर १३ भित्रै सक्न पनि निर्देशन दिइएको छ।

यसका लागि सम्बन्धित क्षेत्रको अन्तिम मतदाता नामावली अनिवार्य रूपमा प्रकाशित गर्न, सो सूची केन्द्रीय संगठन विभागलाई उपलब्ध गराउन, र मंसिर १२ गते साँझसम्म सर्वसम्मतिले प्रतिनिधि चयन गर्ने प्रयास गर्न बताइएको छ।

आगामी मंसिर २७ देखि २९ गतेसम्म हुने एघारौँ महाधिवेशनका लागि मंसिर १३ गते एकैदिन महाधिवेशन प्रतिनिधि छनोट हुनेछ। यस महाधिवेशनमा करिब २२ सय प्रतिनिधि सहभागी हुने एमालेले जनाएको छ।