संकटका बेला मन्त्री बनें, चुनौतीलाई अवसरमा बदल्ने गरी काम गर्छु : मन्त्री घिसिङ

चितवन, १० मंसिर । ऊर्जा, भौतिक पूर्वाधार तथा सहरी विकासमन्त्री कुलमान घिसिङले संकटका बेला आफू मन्त्री बनेको बताएका छन् । आज काठमाडौँमा राष्ट्रिय युवा परिषद् र नेपाल बिजनेस इन्स्टिच्युटले आयोजना गरेको ‘नेपाल युवा उद्यमशीलता शिखर सम्मेलन’को उद्घाटनसत्रमा बोल्दै मन्त्री घिसिङले जेनजी आन्दोलनपछि संकटका बेला आफू मन्त्री बनेकाे र त्यो चुनौतीलाई अवसरमा बदल्ने बताए ।

राजनीतिक र व्यवस्था परिवर्तन गर्न पुराना राजनीतिक दल र नेता सफल भए पनि परिवर्तनपश्चात् समृद्धिको नेतृत्व गर्न चुकेको उनको भनाइ थियो । साथै, जेनजी आन्दोलनको भावनाअनुसार मुलुकमा सुशासन कायम गर्न र तोकिएको समयमा निर्वाचन सम्पन्न गर्न सरकार केन्द्रित रहेको पनि उनले बताए ।

सबै राजनीतिक दल निर्वाचन भाग लिन निर्वाचन आयोगमा दर्ता भइसकेकाले तोकिएको समयमा नै निर्वाचन हुने उनको भनाइ थियो ।