प्रधानमन्त्री कार्कीसँग संगीत तथा नाट्य प्रज्ञा प्रतिष्ठानका पदाधिकारीको शिष्टाचार भेट

चितवन, ०९ पुष । प्रधानमन्त्री सुशीला कार्कीसँग नेपाल संगीत तथा नाट्य प्रज्ञा प्रतिष्ठानका पदाधिकारीहरूले बुधबार शिष्टाचार भेट गरेका छन्।

कुलपति निशा शर्मा, उपकुलपति शम्भु राईलगायतको टोलीले प्रधानमन्त्री तथा मन्त्रिपरिषद्को कार्यालय, सिंहदरबारमा प्रधानमन्त्री कार्कीसँग भेट गरेको हो।

भेटका क्रममा टोलीले विशिष्ट परिस्थितिमा गठन भएको वर्तमान सरकारले आफ्नो कार्यादेश सफलतापूर्वक सम्पन्न गरोस् भन्ने शुभकामना व्यक्त गरेको थियो। प्रधानमन्त्री कार्की संगीत तथा नाट्य प्रज्ञा प्रतिष्ठानकी पदेन संरक्षकसमेत हुन्।

यस अवसरमा कुलपति शर्माले प्रतिष्ठानको वर्तमान अवस्था र आगामी कार्ययोजनाबारे प्रधानमन्त्रीलाई जानकारी गराइन्। उनले देशको गीत, संगीत तथा नाट्य विधामा अध्ययन, अनुसन्धान र संरक्षणका काम आवश्यक भए पनि यस क्षेत्रले राज्यको प्राथमिकता नपाएको गुनासो गरिन्।

हाल प्रतिष्ठान प्रिफ्याबको अस्थायी टहरामा सञ्चालन भइरहेको उल्लेख गर्दै उनले स्थायी भवन निर्माणका लागि आवश्यक स्रोतसाधनको खोजी भइरहेको जानकारी गराइन्।

नेपाल प्रज्ञा प्रतिष्ठानलाई अझ विशिष्टीकृत गर्दै २०६४ सालमा तीनवटा छुट्टाछुट्टै प्रतिष्ठान गठन गरिएको थियो, जसमध्ये नेपाल संगीत तथा नाट्य प्रज्ञा प्रतिष्ठान एक हो।

प्रधानमन्त्री कार्कीले यस विषयमा सम्बन्धित मन्त्रालय तथा सरोकारवाला निकायहरूसँग परामर्श गरी आवश्यक पहल गर्ने आश्वासन दिएको प्रधानमन्त्रीको सचिवालयले जनाएको छ।