फागुन २१ को निर्वाचन तयारी अन्तिम चरणमा, महिला निर्वाचन अधिकृतको नेतृत्व

चितवन, १३ माघ । आगामी फागुन २१ गतेका लागि तय गरिएको प्रतिनिधिसभा सदस्यको निर्वाचनको तयारी अन्तिम चरणमा पुगेको छ । निर्वाचन हुने वा नहुने भन्ने आशंकाबीच सुरु भएको तयारी अहिले सुनिश्चिततातर्फ अघि बढेको निर्वाचन आयोगले जनाएको छ ।

निर्वाचन गराउने जिम्मेवारी पाएको सरकारले यसलाई उच्च प्राथमिकतामा राखेर काम गरिरहेको छ । त्यसकै प्रभावस्वरूप मुलुक निर्वाचनमय बनेको छ भने संघीय राजधानी काठमाडौँमा यसको प्रभाव झनै देखिएको छ ।

काठमाडौँ सबैभन्दा बढी निर्वाचन क्षेत्र भएको जिल्ला हो । यहाँ १० वटा निर्वाचन क्षेत्र रहेका छन् र प्रत्येक निर्वाचनमा यी क्षेत्रको चर्चा विशेष रूपमा हुने गर्दछ । यसपटक पनि राजनीतिक दलहरू आफ्नो उपस्थिति बलियो बनाउन सक्रिय देखिएका छन् । जेनजी आन्दोलनका कारण यो निर्वाचन थप चासोको विषय बनेको छ ।

यस निर्वाचनको व्यवस्थापन र निगरानीको जिम्मेवारी सरकारले ठूलो संख्यामा महिला निर्वाचन अधिकृतलाई सुम्पिएको छ । काठमाडौँ निर्वाचन क्षेत्र नं ३ की मुख्य निर्वाचन अधिकृत चमिला भट्टराईले महिलालाई दिइएको जिम्मेवारीलाई विश्वासको रूपमा लिँदै इमानदारिताका साथ निर्वाह गरिएको बताउनुभयो ।

महालेखा नियन्त्रक कार्यालयका निर्देशक भट्टराईले महिलालाई अवसर दिइएमा उनीहरूले जिम्मेवारीपूर्वक काम गर्ने उल्लेख गर्नुभयो । उहाँका अनुसार महिला नेतृत्वको बोली र व्यवहारले निर्वाचन व्यवस्थापनमा सकारात्मक प्रभाव पार्ने गरेको छ ।

महान्यायाधिवक्ताको कार्यालयकी उपन्यायाधिवक्ता शान्ति न्यौपाने काठमाडौँ निर्वाचन क्षेत्र नं २ को मुख्य निर्वाचन अधिकृतका रूपमा कार्यरत हुनुहुन्छ । उहाँले शान्त, निष्पक्ष र मर्यादित वातावरणमा निर्वाचन सम्पन्न गराउनु आफ्नो प्रमुख दायित्व भएको बताउनुभयो ।

निर्वाचन आयोगका अनुसार काठमाडौँ–४ मा कृष्णा भण्डारी, काठमाडौँ–५ मा श्रद्धा रिजाल, काठमाडौँ–६ मा चपला पोखरेल, काठमाडौँ–७ मा सविता शर्मा, काठमाडौँ–८ मा सम्झना खनाल, काठमाडौँ–९ मा मेनुका घिमिरे र काठमाडौँ–१० मा अमृताकुमारी शर्मा मुख्य निर्वाचन अधिकृतका रूपमा खटिनुभएको छ ।

काठमाडौँ बाहिर पनि विभिन्न निर्वाचन क्षेत्रमा महिला नेतृत्वमा निर्वाचन तयारी भइरहेको छ । पर्सा–४, सिन्धुली–१, नवलपरासी, कास्की–१, मकवानपुर–१, सिन्धुपाल्चोक–२, बागलुङ–१, भक्तपुर–२, ललितपुर–१ र ललितपुर–२ लगायतका निर्वाचन क्षेत्रमा महिलाले मुख्य निर्वाचन अधिकृतको जिम्मेवारी निर्वाह गरिरहेका छन् ।

निर्वाचन आयोगले महिला नेतृत्वको सक्रियताले निर्वाचनलाई निष्पक्ष, शान्त र विश्वसनीय बनाउन महत्वपूर्ण योगदान पुग्ने विश्वास व्यक्त गरेको छ ।