निर्वाचन घोषणा पत्रका लागि सुझाव सङ्कलन गर्दै एमाले
चितवन, १५ माघ । नेपाल कम्युनिस्ट पार्टी (एमाले)ले प्रतिनिधिसभा निर्वाचनका लागि घोषणा पत्र तयार पार्ने उद्देश्यले सुझाव सङ्कलन गरिरहेको छ। पार्टीले आगामी फागुन २१ मा हुने निर्वाचनलाई लक्षित गर्दै पार्टी सङ्गठन, जनवर्गीय सङ्गठनलगायत विभिन्न निकायसँग सुझाव मागेको एमालेका प्रचार संयोजक मीनबहादुर शाहीले जानकारी दिए।
उनका अनुसार हालसम्म प्राप्त अधिकांश सुझावलाई समेट्दै घोषणा पत्र लेखनको काम अगाडि बढाइएको छ। “केही छुटेका क्षेत्रबाट समेत सुझाव सङ्कलन गरी घोषणा पत्रको अन्तिम मस्यौदा तयार गर्नेछौँ,” उनले बताए।
एमालेले पार्टी अध्यक्ष केपी शर्मा ओलीको संयोजकत्वमा घोषणा पत्र मस्यौदा समिति गठन गरेको छ। समितिमा उपाध्यक्षद्वय रामबहादुर थापा ‘बादल’ र विष्णु पौडेल, महासचिव शङ्कर पोखरेल तथा नेताहरू ईश्वर पोखरेल, प्रदीप ज्ञवाली र विष्णु रिमाल सदस्य रहेका छन्।
