मधेस प्रदेशका १ हजार २४६ मतदानस्थल अतिसंवेदनशील

चितवन, १५ माघ । आगामी फागुन २१ गते हुने प्रतिनिधिसभा सदस्य निर्वाचनका लागि मधेस प्रदेशका कुल २ हजार १६० मतदानस्थलमध्ये १ हजार २४६ वटा मतदानस्थललाई अतिसंवेदनशीलको श्रेणीमा राखिएको छ ।

मधेस प्रदेश प्रहरी कार्यालयका अनुसार भारतसँग सीमा जोडिएका अधिकांश मतदानस्थलहरूलाई अति संवेदनशील मानिएको हो । ती क्षेत्रको सुरक्षा व्यवस्थापन, अनुगमन तथा जोखिम न्यूनीकरणका लागि योजनाबद्ध तयारी भइरहेको प्रदेश प्रहरी कार्यालयका प्रवक्ता कमल थापाले जानकारी दिए ।

बिहीबार जनकपुरधाममा आयोजित पत्रकार सम्मेलनमा मधेस प्रदेशमा प्रतिनिधिसभाका लागि ३२ निर्वाचन क्षेत्र रहेको उल्लेख गर्दै ७५५ मतदानस्थल संवेदनशील, १५९ मतदानस्थल सामान्य रहेको जनाइएको छ । प्रदेशभर कुल ४ हजार ४७१ मतदान केन्द्र तोकिएका छन् ।

निर्वाचनमा विभिन्न राजनीतिक दल तथा स्वतन्त्र गरी कुल १ हजार २८ जना उम्मेदवार प्रतिस्पर्धामा छन् । मधेस प्रदेशमा कुल मतदाता संख्या ३५ लाख १७ हजार १२३ रहेको छ । यसमध्ये १९ लाख पाँच हजार ८१९ पुरुष र १६ लाख ११ हजार ३०४ महिला मतदाता रहेको निर्वाचन प्रशासनले जनाएको छ ।