प्रहरी हवल्दार हत्या प्रकरणमा थप एक पक्राउ
प्रकाशित मिति: बुधबार, माघ २८, २०८२ | १७:५२:५७
चितवन, २८ माघ । दार्चुलाको महाकाली नगरपालिका–४ मा प्रहरी हवल्दार योगेन्द्र घर्तीको हत्या प्रकरणमा फरार रहेका थप एक जना पक्राउ परेका छन्। यससँगै घटनामा संलग्न आरोपमा पक्राउ पर्ने संख्या चार पुगेको छ भने तीन जना अझै फरार रहेका छन्।
जिल्ला प्रहरी कार्यालय दार्चुलाका प्रवक्ता प्रहरी निरीक्षक हेमराज भट्टका अनुसार पक्राउ पर्ने व्यक्ति राजेन्द्र डडाल हुन्। उनलाई मंगलबार साँझ नियन्त्रणमा लिइएको हो।
यसअघि प्रहरीले २० वर्षीया दिपीका पाल, २१ वर्षीया पायल लुहार र सुरेन्द्र बमलाई पक्राउ गरिसकेको थियो। डडालमाथि हत्यापछि शव व्यवस्थापनमा सहयोग गरेको आरोप रहेको प्रहरीले जनाएको छ।
प्रहरीका अनुसार घटनामा संलग्न रहेको आरोपमा अस्मिता बियर बारका सञ्चालक आशिक पाल, उनकी जेठी श्रीमती लक्ष्मी बडु र भाइ मनिष पाल फरार छन्। पक्राउ परेकी दिपीका पाल आशिककी कान्छी श्रीमती रहेको खुलेको छ।
प्रारम्भिक अनुसन्धानअनुसार बियर बारमा दिपीकामाथि दुर्व्यवहार भएको विषयलाई लिएर विवाद हुँदा आशिकले हवल्दार घर्तीमाथि कुटपिट गरेका र सोही क्रममा उनको मृत्यु भएको प्रहरीले जनाएको छ।
प्रकाशित मिति : बुधबार, माघ २८, २०८२ |
१७:५२:५७
265
