चितवन कोल्ड स्टोरेज चौध वर्षपछि पुनः सञ्चालनमा
चितवन, २५ फागुन ।
चितवनको भरतपुर–९ आदर्शचोकमा रहेको शीत भण्डार पुनः सञ्चालनमा आएको छ । विसं २०६३ देखि बन्द रहेको शीतभण्डार फागुन १० गतेदेखि सञ्चालनमा आएको हो ।
चितवनका ५ जना युवाहरु मिलेर सञ्चालन ल्याएको शीत भण्डारमा २ हजार टन कृषि उपजका सामग्री राख्न सकिने छ । अहिले आलु, प्याज, गाजर, सुन्तला, कागती, स्याउ लगायतका कृषिजन्य वस्तुको भण्डार गर्न सकिने चितवन कोल्ड स्टोरेजका सञ्चालक राजकुमार श्रेष्ठले जानकारी दिनुभयो । विसं २०४६ मा स्थापना भएको शीत भण्डारलाई १५ करोड रुपैयाँ खर्चिएर पुनः सञ्चालनमा ल्याइएको हो । अत्याधुनिक प्रविधि अनुसार कुलिङको व्यवस्था गरिएको उहाँले बताउनुभयो ।
“स्थानीयस्तरमा उत्पादित कृषि उपजको बजारमा माग भएका बेला बिक्री गर्न सकिने भएकाले कृषक उपजले उचित मूल्य प्राप्त गर्ने लक्ष्यसहित शीत भण्डार बनाएका हौँ ।” संयोजक श्रेष्ठले भन्नुभयो “शीत भण्डार सञ्चालनमा आएपछि कुहिएर खेर जाने वस्तुको सदुपयोग हुनेछ । कृषकले उत्पादन गर्ने फलफूल तथा कृषिजन्य सामग्री भण्डारण गर्न सक्नुहुन्छ ।” चितवन कोल्ड स्टोरेज नाम दिएर सञ्चालनमा ल्याइएको शीत भण्डारमा केही समयपछि माछा, मासुको पनि भण्डारण गरिने उहाँले बताउनुभयो । शीत भण्डार मल्टी च्याम्बर प्रविधिबाट निर्माण गरिएको छ ।
उहाँका अनुसार चितवनमा ३ वटा शीत भण्डार सञ्चालनमा छन् । तर, चितवनको पुरानो र ठुलो शीत भण्डार चितवन कोल्ड स्टोरेज हो । अझै जिल्लामा १० देखि १२ हजार टन क्षमताको शीतभण्डारको आवश्यकता रहेको उहाँको भनाइ छ । अहिले जिल्लामा भण्डारण गर्ने ठाउँको अभावमा कृषि उपजहरु खेर गइरहेको उहाँले बताउनुभयो । शीत भण्डार पुर्णरुपमा सञ्चालनमा आएपछि सामानको मूल्य समेत घट्ने उहाँको दावी छ । अहिले जिल्लामा गोरखा, तनहुँ, लम्जुङबाट समेत किसानहरुले भण्डारणका लागि कृषि उपज ल्याउने गरेका छन् ।
कृषकहरूले विशेषगरी आलु, सुन्तला र प्याजको भण्डारण, ढुवानी र लोड अनलोडमा धेरै रकम खर्चनु परेको छ । अब थोरै लगानीमा तरकारी तथा फलफूलहरु भण्डारण गर्न सकिने सञ्चालक श्रेष्ठले बताउनुभयो ।