कात्तिक ६ गते ११ः३९ बजे भाइटीकाको उत्तम साइत

चितवन,२८ असोज । नेपाल पञ्चाङ्ग निर्णायक विकास समितिले यस वर्षको भाइटीकाको उत्तम साइत सार्वजनिक गरेको छ।

समितिका अध्यक्ष प्रा. शम्भुप्रसाद ढकालले राससलाई जानकारी दिनुभयो कि कात्तिक ६ गते बिहीबार बिहान ११ः३९ बजे भाइटीकाको साइत उत्तम रहेको छ। समितिका सदस्य प्रा. देवमणि भट्टराईका अनुसार मध्याह्नकालमा टीका लगाउन बाधा नभए पनि साइत खोज्नेका लागि धनु लग्न, कन्या नवमांश, चर बेला, अभिजित् योग र विजय मुहूर्तको शुभ समय दिइएको छ। उहाँले भने, “राज्य सञ्चालकले भने साइतमै टीका लगाउनुपर्छ। सर्वसाधारणका लागि मध्याह्नकालमा टीका लगाउन कुनै समस्या छैन।”

यस वर्ष यमपञ्चक कात्तिक १ गते शनिबारदेखि सुरु हुँदैछ, जसमा यमदीप दान, धन त्रयोदशी र धनतेरस पर्व पर्दछ। कात्तिक २ गते आइतबार काग तिहार र धनवन्तरी जयन्ती मनाइनेछ। कात्तिक ३ गते सोमबार नरक स्नानसहित कुकुर तिहार र बेलुकी लक्ष्मीपूजा हुनेछ। दिउँसो ०२ः५२ बजेसम्म कात्तिक कृष्ण चतुर्दशी रहने भएकोले औँसी तिथिमा सम्बन्धित कार्य शास्त्रसम्मत रूपमा तय गरिएको छ।

गाई, गोरु र आत्म (म्ह) पूजा कात्तिक ५ गते बुधबार सम्पन्न गरिनेछ। नेवार समुदायले विशेष रूपमा मनाउने आत्म (म्ह) पूजा र नयाँ वर्ष पनि यस दिन नेपाल संवत् अनुसार सुरु हुनेछ। यस वर्ष नेपाल संवत् ११४६ को शुरुवात कात्तिक शुक्ल प्रतिपदामा हुनेछ।

भाइटीका, जसलाई नेवारी भाषामा किजापूजा भनिन्छ, कात्तिक ६ गते बिहीबार मध्याह्नकालमा शास्त्रीय विधिअनुसार सम्पन्न हुनेछ। शास्त्रीय ग्रन्थअनुसार भ्रातृपूजा भन्ने शब्दले दाजुभाइ दुवैलाई बुझाउँछ, र भाइटीका ज्येष्ठको क्रमानुसार दाजुभाइलाई टीकाटाला गर्नु शास्त्रसम्मत मानिन्छ।

यमपञ्चक पर्व कात्तिक कृष्ण त्रयोदशीदेखि कात्तिक शुक्ल द्वितीयासम्म मनाइन्छ। यस क्रममा यमदीपदान, काग र कुकुरलाई मीठा परिकार दिएर यमदूतलाई खुश राख्ने वैदिक परम्परा समेत जारी छ।