जङ्कफुड र पेनकिलरले बालबालिकामा ग्यास्ट्रिक बढ्दै
चितवन, १७ माघ । सामान्यतया ठूला मानिसलाई हुने ‘ग्यास्ट्रिक’को समस्या बालबालिकामा पनि देखिने गरेको चिकित्सकहरूले बताएका छन् । बालबालिकामा ग्यास्ट्रिक हुनुको मुख्य कारण ‘एच पाइलोरी’ नामक कीटाणुको सङ्क्रमण भएको कान्ति बाल अस्पतालका पेटसम्बन्धी विशेषज्ञ चिकित्सक डा सुमित अग्रवालले जानकारी दिए ।
उनका अनुसार यो कीटाणुको सङ्क्रमण सानै उमेरदेखि शरीरमा रहन सक्छ । बालबालिकाले चिल्लोपिरो तथा जङ्कफुड बढी सेवन गर्न थालेपछि ग्यास्ट्रिकको समस्या देखा पर्ने गर्दछ । यस्तै, पेनकिलर औषधिको प्रयोगले पनि बालबालिकामा ग्यास्ट्रिक बढाउने गरेको डा अग्रवालले बताए ।
बयस्कमा ग्यास्ट्रिक हुँदा पेट दुख्ने, खाना नरुच्ने र मुखमा अमिलो आउने समस्या देखिन्छ भने बालबालिकामा मुखबाट अमिलो पानी आउने, बिहान र साँझ पेट दुख्ने, खाना खाएपछि कहिले धेरै त कहिले कम दुख्ने, लगातार बान्ता आउने तथा पेट फुल्ने जस्ता लक्षण देखिने गर्छन् ।
यी लक्षणका कारण बालबालिकाको खानपान घट्दै जान्छ र उपचार ढिला भएमा तौलसमेत घट्ने खतरा रहन्छ । समयमै उपचार नगरिए पेट दुखाइ बढ्दै मुखबाट रगत आउने, सानो आन्द्राको प्वाल खुम्चिने तथा सानो आन्द्राको पहिलो भागमा अल्सरजस्ता जटिल समस्या देखिन सक्ने चिकित्सकले चेतावनी दिएका छन् ।
कान्ति बाल अस्पतालमा दैनिक दुईदेखि तीन जना ग्यास्ट्रिक भएका बालबालिका उपचारका लागि आउने गरेको र हप्तामा एक–दुई जना रगत बान्ता गर्ने बिरामी आउने गरेको डा अग्रवालले बताए । हप्तामा तीनदेखि पाँच जना बालबालिकामा गरिएको इन्डोस्कोपी परीक्षणमा करिब ७५ प्रतिशतमा ‘एच पाइलोरी’ कीटाणुको सङ्क्रमण देखिने गरेको उनको भनाइ छ ।
शरीरमा आवश्यकभन्दा बढी एसिड उत्पादन हुनुलाई ग्यास्ट्रिक भनिन्छ । सामान्यतया १८ महिनादेखि १४ वर्ष उमेर समूहका बालबालिकामा ‘एच पाइलोरी’ सङ्क्रमण देखिने गरेको र सात–आठ वर्षपछि यसको लक्षण प्रस्ट देखिन थालेको चिकित्सकहरूले बताएका छन् । डा अग्रवालका अनुसार ‘एच पाइलोरी’ जीवाणुको औषधि नियमित रूपमा दुई हप्ता सेवन गरेमा यो समस्या निको हुन्छ ।
