इरानसँग युद्ध अन्त्य गर्न हतार छैन: ट्रम्प, सम्झौता नभए सैन्य कारबाही पुनः सुरु गर्ने चेतावनी

चितवन, ११ बैशाख । अमेरिकी राष्ट्रपति डोनाल्ड ट्रम्पले इरानसँगको युद्ध अन्त्य गर्न आफू हतारमा नरहेको बताएका छन्। ह्वाइट हाउसमा पत्रकारहरूसँग कुरा गर्दै उनले वार्ता अझै लम्बिन सक्ने र आफू कुनै निश्चित समयसीमामा बाँधिन नचाहने स्पष्ट पारे।

ट्रम्पका अनुसार युद्धको सुरुआती चार हप्तामै अमेरिकाले सैन्य रूपमा उल्लेखनीय बढत हासिल गरिसकेको छ र अब मुख्य प्रश्न ठोस सम्झौता हुन्छ वा हुँदैन भन्नेमा केन्द्रित छ। परमाणु हतियार प्रयोगबारे सोधिएको प्रश्नमा उनले इरानविरुद्ध यस्तो हतियार प्रयोग गर्ने सोचमा नभएको स्पष्ट पारे।

“सम्झौता नभए सैन्य कारबाही पुनः सुरु हुन्छ,” उनले चेतावनी दिँदै भने, “यस्ता हतियारहरूको प्रयोग कुनै पनि अवस्थामा हुनु हुँदैन।”

ट्रम्पले सामाजिक सञ्जालमार्फत अमेरिकी सेनाले होर्मुज जलमार्गमा आफ्नो गतिविधि तीव्र पारेको जानकारी दिएका छन्। विशेषगरी व्यापारिक जहाजहरूको सुरक्षाका लागि समुद्री मार्गमा राखिएका बारुदी सुरुङ हटाउने कार्यलाई प्राथमिकता दिइएको उनले बताए।

तनाव बढिरहेका बेला अमेरिकी सेनाले हिन्द महासागर क्षेत्रमा तेल तस्करीमा संलग्न रहेको आरोपमा अर्को इरानी ट्यांकर जफत गरेको दाबी गरेको छ। यसअघि इरानले होर्मुज जलमार्गमा तीन मालवाहक जहाजमाथि आक्रमण गरेको घटनाले स्थिति झनै संवेदनशील बनेको थियो।

अमेरिका–इरान द्वन्द्वका कारण विश्वकै प्रमुख समुद्री मार्गबाट हुने तेल आपूर्ति प्रभावित भएको छ। यसले अन्तर्राष्ट्रिय बजारमा इन्धनको मूल्य बढ्ने जोखिम बढाएको छ भने विश्व अर्थतन्त्रमा पनि असर पर्ने चिन्ता व्यक्त गरिएको छ।