चितवन राइनोजको विजयी सुरुवात, कर्णाली याक्स ४ विकेटले पराजित
चितवन, ०२ मंसिर । चितवन राइनोजले नेपाल प्रिमियर लिग (एनपीएल) दोस्रो संस्करणमा विजयी सुरुवात गरेको छ। कीर्तिपुरस्थित त्रिवि अन्तर्राष्ट्रिय क्रिकेट स्टेडियममा मंगलबार सम्पन्न खेलमा चितवनले कर्णाली याक्सलाई ४ विकेटले पराजित गर्दै पहिलो खेलमै दुई अंक जोड्न सफल भयो।
कर्णालीले दिएको १६७ रनको लक्ष्यलाई पछ्याउन उत्रिएको चितवनले १९.१ ओभरमा ६ विकेटको क्षतिमा १७१ रन जोड्दै जित हासिल गर्यो।
चितवनका लागि रवि बोपराले ३६ बलमा ५२ रनसहित अर्धशतकीय इनिङ खेले। उनको राम्रो साथमा दीपक बोहराले ४२ रन, सैफ जइफले अविजित ३८ रन, कप्तान कुशल मल्लले २० रन र अर्जुन साउदले अविजित ८ रन जोडे। कर्णालीतर्फ सोमपाल कामीले २ विकेट लिए भने युनिस सिंह, युवराज खत्री र मार्क वाटले एक–एक विकेट हात पारे।
यसअघि टस हारेर पहिले ब्याटिङ गरेको कर्णालीले निर्धारित २० ओभरमा ३ विकेटको क्षतिमा १६६ रन बनाएको थियो।
कर्णालीका भारतीय ओपनर प्रियाङ्क पान्चालले ९० रनको ब्याटिङ गर्दै उत्कृष्ट प्रदर्शन गरे पनि टोलीलाई जित दिलाउन सकेनन्। उनले ४८ बलमा ७ चौका र ६ छक्काको मद्दतले रन जोडे। पवन सर्राफले अविजित २७, म्याक्स ओ’डाउडले २० र मार्क वाटले १६ रनको योगदान गरे।
चितवनका सैफ जइव, रवि बोपरा र सोहिल तान्विरले एक–एक विकेट लिए।
जितसँगै चितवनले एनपीएलमा सकारात्मक सुरुवात गरेको छ भने कर्णालीले हारबाट यात्रा आरम्भ गरेको छ।
