खैरहनीको चैनपुरमा शनिबारदेखि राष्ट्रिय स्तरकाे फुटबल प्रतियाेगिता
खैरहनी । पूर्वी चितवनकाे खैरहनीका २६ औं दराई राष्ट्रिय नकआउट फुटवल प्रतियाेगिता हुने भएकाे छ । रामकाेला हाम्राे क्लवकाे आयाेजनामा खैरहनी नगरपालिका वडा नम्बर २ चैनपुर स्थित जनजीवन माविकाे खेल मैदानमा शनिवारबाट प्रतियाेगिता सुरु हुने क्लवका अध्यक्ष सुनिल दराइले जानकारी दिए । आयाेजक क्लवले शुक्रवार वडा कार्यालयमा पत्रकार सम्मेलनकाे आयाेजना गरि प्रतियाेगिता गर्नुकाे उद्देश्य र तयारीकाे बारेमा जानकारी गराएकाे हाे ।
प्रतियाेगितमा चितवनसँगै छिमेकी जिल्लाहरुबाट गरि १७ वटा टिमकाे सहभागिता आयोजकले जनाएको छ । क्लव र दराई ईकाइ समितिकाे प्रतिनिधित्व गरेर टिमहरुले प्रतियाेगितामा सहभागिता जनाउने छन् । क्वल तथा इकाइ समितिले दराई समुदायकै खेलाडीहरु समावेश गराउनु पर्ने छ । प्रतियाेगितामा प्रथम हुने टिमले उपाधिसंगै एक लाख र दाेस्राे हुने टिमले ५० हजार पुरस्कार प्रदान गरिने प्रतियाेगिताका संयाेजक मदन दराईले जानकारी दिए । जिल्ला बाहिरबाट आउने खेलाडीकाे लागि खाना र आवासकाे समेत व्यवस्था गरिएकाे उनले बताए ।
प्रतियाेगिता सम्पन्न गर्न मुल व्यवस्थापन समितिसंगै ६ वटा उपसमिती समेत बनाइएकाे छ । खेलकुदकाे माध्यमबाट जातीय पहिचान स्थापित गराउने उद्देश्यले फुटवल प्रतियाेगिता आयाेजना गरिएकाे क्लवका अध्यक्ष सुनिल दराईले बताए । खैरहनी नगरपालिका वड नम्बर २ का वडाध्यक्ष राेहिणीप्रसाद उप्रेतीले प्रतियाेगिताले दराई समुदायकाे पहिचान स्थापितसंगै खैरहनीलाई राष्ट्रिय रुपमा परिचित गराउन सहयाेग गर्ने भएकाले स्थानीय सरकारले सहयाेग गर्ने बताए । उद्घाटन पुर्व रामकोलादेखि खेल मैदानसम्म झाकीसहितको शोभा यात्रा निकालिने आयोजकले जनाएको छ । प्रतियोगिताको पहिलो दिन शनिबार खैरहनी ११ र अरुणखोलाको समुहबिच खेल हुनेछ ।
