खैरहनीमा शिक्षकहरुको मैत्रीपूर्ण भलिवल प्रतियोगिता सुरु

चितवन , ११ फागुन । पूर्वीचितवनको खैरहनीमा मैत्रीपूर्ण शिक्षक भलिवल प्रतियोगिता सुरु भएको छ । खैरहनी नगरपालिकाको आयोजनामा तथा इन्टरनेशनल ईङ्गलिश मोडेल स्कुलको संयोजनमा संचालन भएको नगर स्तरिय अन्तर विद्यालय शिक्षक भलिवल प्रतियोगिता आज खैरहनी नगरपालिकाका नगर प्रमुख शशि कुमार खनियाँले उद्घाटन गरेका हुन् ।

उद्घाटनको क्रममा बोल्दै नगर प्रमुख खनियाँले यस्तो खेलको माध्यमबाट विभिन्न विद्यालयका शिक्षकहरुको भेटघाटको अवसर मिल्ने र भाइचाराकोे विकास हुने बताए । निजी र संस्थागत विद्यालयका शिक्षकहरुबिचको आत्मिय भावनाले एकअर्काका शैक्षिक गतिविधिको समेत आदानप्रदान गर्न सकिने उनले बताए । खेलबाट रमाइलो मात्रै नभएर अनुशासन सिकाउने माध्यमको रुपमा समेत लिनसकिनेमा नगर प्रमुख खनियाँले जोड दिए ।

कार्यक्रममा खैरहनी नगरपालिका वडा नम्बर २ का वडा अध्यक्ष तथा सामाजिक विकास समितिका संयोजक रोहिणी प्रसाद उप्रेती , नगर शिक्षा अधिकारी राजु बानियाँ , इन्टरनेशनल ईङ्गलिश मोडेल स्कुलका प्राचार्य धनविर चौधरी लगायतले मन्तव्य राखेका थिए । प्रतियोगितामा नगरभित्रका विद्यालयहरुबाट पुरुष र महिलाहरुको गरि २१ वटा समूहको सहभागिता रहेको छ । दुईसम्म चल्ने प्रतियोगितामा प्रथम, द्धितिय र तृतिय हुने समूहलाई मेडल र ट्रफी प्रदान गरिने इन्टरनेशनल ईङ्गलिश मोडेल स्कुलकी निर्देशक मन्जु चौधरीले जानकारी दिइन् । उद्घाटन कार्यक्रममा खैरहनी नगरपालिकाका प्रमुख प्रशासकिय अधिकृत विष्णुप्रसाद सापकोटा ,विभिन्न वडाका वडा अध्यक्षहरु, इलाका प्रहरी कार्यालय खैरहनीका प्रहरी निरिक्षक भानु खड्का , नगर खेलकुद विकास समितिका अध्यक्ष धनविर चौधरी , खैरहनी नगर व्याब्सनका अध्यक्ष टेकराज अधिकारी , विभिन्न विद्यालयका प्राचार्यहरुको उपस्थिति रहेको थियो ।