छुवाछूतका घटनामा मिडियाको दृष्टिकोण’ सार्वजनिक

काठमाडौँ, १२ असोज

लेखक तथा पत्रकार लक्ष्मण दर्नालद्वारा लिखित ‘जातीय भेदभाव तथा छुवाछूतका घटनामा मिडियाको दृष्टिकोण’ नामक पुस्तक सार्वजनिक भएको छ ।

दलित महिला केन्द्र नेपालद्वारा यहाँ आज आयोजित पुस्तक बिमोचन तथा अन्तक्र्रिया कार्यक्रममा प्रदेश नंं २ का प्रदेश प्रमुख तिलक परियारले सो पुस्तकको विमोचन गर्नुभयो । पुस्तकमा गत जेठ १० गते रुकुम पश्चिम चौरजहारी नगरपालिका–८ सोतीमा भएको घटनाबारे नेपालका पत्रपत्रिका (छापा माध्यम) ले प्रकाशन गरेका समाचार, सम्पादकीय र लेखलाई तथ्यमा आधारित भएर विश्लेषण गरिएको छ ।

पुस्तकमा समावेश तथ्यअनुसार काठमाडौँबाट प्रकाशित आठ वटा दैनिक पत्रिकाको समाचार हेर्दा ७२.७२ प्रतिशत समाचारले रुकुम घटना जातीय भेदभाव तथा छुवाछूतका कारणले भएको औँल्याएका छन् भने ४७.५५ प्रतिशत समाचारले हत्या भनेका छन् ।
सो घटनाका बारेमा ५२.४४ प्रतिशत समाचारले नदीमा ज्यान जोगाउन हाम्फालेको मृत्यु÷घटना भनी उल्लेख गरेको पाइएको छ । घटनास्थल रुकुम पश्चिमबाट सबैभन्दा कम (१८ प्रतिशत) समाचार प्रकाशन भएका छन् । जाजरकोटबाट ३२ प्रतिशत र बाँकी सबै काठमाडौँबाट लेखिएका समाचार प्रकाशन भएका छन् ।

सोही अवसरमा प्रदेश प्रमुख परियारले जातीय भेदभाव तथा छुवाछूतका घटनामा मिडियाको भूमिकालाई जोडेर लेखिएको पुस्तकले दलित आन्दोलनलाई सहयोग पुग्ने अपेक्षा गर्नुभयो । सांसद मीन विश्वकर्मा, लक्ष्मी परियारले पछिल्लो समयमा देशँैभरि जातीय भेदभाव तथा छुवाछूतका घटना बढ्दै गए पनि ती घटनामा राज्यले बेवास्ता गरेको गुनासो गर्नुभयो ।  रासस