सडक दुर्घटना न्यूनीकरणका लागि कालिकामा ट्राफिक सचेतना कार्यक्रम

चितवन, २० भदौ । सडक दुर्घटना न्यूनीकरणका लागि कालिकामा  ट्राफिक सचेनता कार्यक्रम गरिएको छ । कालिका नगरपालिका वडा नम्बर ३ स्थित जनहित राष्ट्रिय माध्यमिक विद्यालयमा ,  इलाका प्रहरी कार्यालय टाँडी , लुमन्ती र विद्यालयको सहकार्यमा ट्राफिक सचेतना कार्यक्रम गरेको हो ।

अस्थायी ट्राफिक प्रहरी पोष्ट टाडीका ट्राफिक प्रहरी नायब निरीक्षक सुरेन्द्र प्रसाद कोइरालाले सडक दुर्घटनाको अवस्था, दुर्घटनाबाट हुने मानवीय तथा भौतिक क्षति, ट्राफिक नियम र संकेतहरूको विषयमा  विद्यार्थीहरुलाई प्रशिक्षण दिएका थिए ।

उनले यात्रु, सवारी चालक र पैदल यात्री सबैले ट्राफिक नियमको पालना गर्नुपर्नेमा जोड दिँदै ट्राफिक सचेतनाको अभावका कारण विशेषगरी बालबालिका दुर्घटनाको उच्च जोखिममा पर्ने जानकारी गराए।

“विश्वभर बार्षिक ४ करोडभन्दा बढी मानिस सडक दुर्घटनाबाट ज्यान गुमाइरहेका छन्। यान्त्रिक गडबडी, चालकको लापरबाही र सडकको कमजोर अवस्थाका कारण दुर्घटनाको संख्या बढ्दो छ,” कोइरालाले भने।

उनले बाल्यकालदेखि नै ट्राफिक सचेतना दिने अभ्यासले दीर्घकालीन रूपमा दुर्घटना न्यूनीकरणमा प्रभाव पार्ने विश्वास व्यक्त गरे।

कार्यक्रमले विद्यार्थीहरूमा सडक सुरक्षाप्रतिको चेतना अभिवृद्धि गर्नुका साथै विद्यालय, प्रहरी र समुदायबीच समन्वयात्मक सम्बन्ध सुदृढ गरेको विद्यालयले जनाएको छ। विद्यालय व्यवस्थापन समितिका अध्यक्ष नरेश वाइवाको अध्यक्षतामा सम्पन्न कार्यक्रममा कालिका नगरपालिका वडा नं. ३ का वडा अध्यक्ष वीरेन्द्र तामाङ प्रमुख अतिथिको रूपमा उपस्थित रहेका थिए ।

कार्यक्रममा वडा सदस्य बुद्धिप्रसाद ढकाल, लिला दमाई, लुमन्ती चितवनका कार्य क्षेत्र संयोजक सिंह वाइवा, जनप्रिय टोल विकास संस्थाका अध्यक्ष मानवबहादुर तामाङ, विद्यालयका प्रधानाध्यापक भरतराज रेग्मी लगायतको उपस्थिति रहेको थियो। कार्यक्रममा लुमन्तीका सामुदायिक परिचालक विकास रानामगरले कार्यक्रमको उद्देश्यसहित स्वागत मन्तव्य राखेका थिए। कार्यक्रममा विद्यालयका बाल क्लब अध्यक्ष सबिना बमजन, स्काउट अध्यक्ष अस्मी थापामगर, जुनियर रेडक्रस सर्कलका सभापति सुष्मा थिङ लगायत १२० जनाको उपस्थिति रहेको थियो ।