चितवनमा ट्याक्टर र बलेरो ठोक्किँदा एक महिलाको मृत्यु, १० घाइते

चितवन,१९ असोज । चितवनकोकालिका नगरपालिक वडा नम्बर ५ वडा कार्यालय चोकमा ट्याक्टर र बलेरो गाडी आपसमा ठोक्किँदा एक महिलाको मृत्यु भएको छ भने चालकसहित १० जना घाइते भएका छन्।
​आज दिउँसो करिब १:३५ बजेको समयमा मचौली टोलबाट लंकालाइनतर्फ जाँदै गरेको ना ६ त ६४४४ नम्बरको ट्याक्टर र कामिनीघाटबाट बनकट्टातर्फ जाँदै गरेको बा.प्र.३-०१-०२४ च ३४७३ नम्बरको बलेरो गाडी आपसमा ठोक्किएर दुर्घटना भएको थियो।
​दुर्घटनामा गम्भीर घाइते भएका बलेरोमा सवार व्यक्तिहरूलाई उपचारका लागि पुरानो मेडिकल कलेज, भरतपुरतर्फ पठाइएकोमा उपचारका क्रममा बलेरोमा सवार कालिका नगरपालिका–३ बस्ने ३५ वर्षीया लक्ष्मी परियारको दिउँसो २:३९ बजे मृत्यु भएको प्रहरीले जनाएको छ। दुर्घटनामा बलेरो चालकसहित अन्य १० जना यात्रु घाइते भएका छन् र उनीहरूको सोही अस्पतालमा उपचार भइरहेको छ।
​घटनास्थलमा तत्काल खटिएको प्रहरी टोलीले दुर्घटनामा संलग्न ट्याक्टर, बलेरो र ट्याक्टरका चालक कालिका नगरपालिका–१ बस्ने ४२ वर्षीय विके श्याङ्वोलाई नियन्त्रणमा लिएको छ। बलेरो चालक पनि घाइते भई अस्पतालमा उपचाररत रहेका छन् भने घटनाबारे थप अनुसन्धान भइरहेको छ।
​
घाइतेहरूको नामावली:
​१. कोमल बहादुर श्रेष्ठ (वर्ष ३९, बलेरो चालक, जि. चितवन कालिका न.पा.–३) – अवस्था मध्यम
​२. सावित्री माझी (वर्ष ५२, जि. चितवन कालिका न.पा.–३) – अवस्था मध्यम
​३. उमा श्रेष्ठ (वर्ष २६, जि. चितवन कालिका न.पा.–७) – अवस्था मध्यम
​४. कविता परियार (वर्ष २५, जि. चितवन कालिका न.पा.–३) – अवस्था मध्यम
​५. मैया कुमारी लोप्चन (वर्ष ४३, जि. चितवन कालिका न.पा.–३) – अवस्था मध्यम
​६. जुनी सुनार (वर्ष २२, जि. चितवन कालिका न.पा.–३) – अवस्था मध्यम
​७. उमा वाइवा (वर्ष २०, जि. चितवन कालिका न.पा.–३, टाउकोमा चोट) – अवस्था मध्यम
​८. पवित्रा वि.क. (वर्ष २०, जि. चितवन कालिका न.पा.–३) – अवस्था मध्यम
​९. लाल कुमारी गुम्वा (वर्ष ४२, जि. चितवन कालिका न.पा.–३) – अवस्था मध्यम
​१०. सितामाया श्रेष्ठ (वर्ष ३५, जि. चितवन कालिका न.पा.–३) – अवस्था मध्यम