मौरीपालनबाट कास्कीको रुपामा ७ सयभन्दा बढीलाई रोजगारी

चितवन, २७ फाल्गुण। कास्कीको रुपा गाउँपालिकामा एक वर्षमा एक लाख लिटर मह उत्पादन भएको छ।

कृषकहरूलाई मौरीपालनतर्फ आकर्षित गर्न गाउँपालिकाले लगानी बढाउँदै जाँदा मह उत्पादन पनि बढेको हो।

तीन वर्षअघि मौरीपालनका लागि नमूना परीक्षण सुरु गरेको गाउँपालिकाले यसको सम्भावना देखेपछि कृषकलाई प्रोत्साहित गर्न अनुदान कार्यक्रम सञ्चालन गरेको गाउँपालिकाका अध्यक्ष नवराज ओझाले जानकारी दिनुभयो।

गाउँपालिकाभित्रका कृषकका लागि दुई हजार १०० मौरीका घार ५० प्रतिशत अनुदानमा वितरण गरिसकिएको उहाँले बताउनुभयो। यस वर्ष गाउँपालिकाभित्र एक लाख लिटर मह उत्पादन भएको उहाँको भनाइ छ।

उत्पादित महको बजारीकरणमा समस्या नभएको उल्लेख गर्दै उहाँले घरघरबाटै मह बिक्री हुने गरेको बताउनुभयो। मौरीपालनसँगै गाउँपालिकाभित्र करिब ७०० जना स्वरोजगार बनेका छन्।

उहाँका अनुसार विशेषगरी रुपा–१ देउपुर बेसी, रुपा–२ सिर्कुतान, वडा नं. ३ को छापपाखा, वडा नं. ४ को माउडाँडा, रुपा–५ को देउराली/देउराली फेदी, रुपा–६ को भिरचोक–खोलाको छेउ र रुपा–७ को काउरे–हंशपुर–माझठाना लगायतका स्थानमा मौरीपालनतर्फ आकर्षण बढिरहेको छ।