चितवन, २३ पुष । नेपालको पहिलो चरा अभयारण्य (वर्ड स्याङ्चुरी) घोडाघोडी सिमसार क्षेत्रमा हरिहाँसको सङ्ख्या यस वर्ष बढेको छ। चरा संरक्षण नेटवर्क, कैलालीले यही पुस १९ देखि २१ गतेसम्म जलपन्छी गणना गरेको थियो। सचिव रामकुमार चौधरीका अनुसार, घोडाघोडी क्षेत्रमा हिउँद र वर्षायाम गरी प्रत्येक वर्ष दुई पटक जलपन्छी गणना गरिन्छ।

गणनाका परिणाम अनुसार, सन् २०२२ मा हरिहाँस ३९४ थियो, सन् २०२३ मा घटेर ३१६ पुगेको थियो। सन् २०२४ मा यो ४११, सन् २०२५ मा ३७२ रहँदा, यस वर्ष ४२९ पुगेको छ। तर जलपन्छीको कुल सङ्ख्या भने घटेको छ; सन् २०२५ मा एक हजार ३१६ रहेको जलपन्छीको संख्या यस वर्ष घटेर एक हजार १६८ पुगेको छ।

घोडाघोडी ताल नेपालका तराई क्षेत्रको सबैभन्दा ठूलो प्राकृतिक ताल हो र वरिपरिका २४ वटा तालहरू जलपन्छीका लागि उपयुक्त बासस्थान हुन्। चरा संरक्षण नेटवर्कका अध्यक्ष दयाराम चौधरीका अनुसार, बासस्थान असुरक्षित हुन, आहारा घट्न, र प्रतिकूल मौसमका कारण जलपन्छीको सङ्ख्या घट्दै गएको छ। सुदूरपश्चिम प्रदेश सरकारले २०७८ फागुन २७ मा यस क्षेत्रलाई नेपालको पहिलो चरा अभयारण्य घोषणा गरेको थियो, जहाँ हाल ३८१ प्रजातिका चरा पाइन्छन्।