बंगलादेशमा गोली प्रहार गरी बीएनपी नेताको हत्या
चितवन, २४ पुष । बंगलादेशमा युवा नेता उस्मान हादीको हत्यापछि चुनावपूर्व राजनीतिक हिंसा थप चर्किँदै गएको छ।
यसैक्रममा बंगलादेश नेसनलिस्ट पार्टी (बीएनपी)को स्वयंसेवी शाखा स्वेच्छासेवक दलका नेता अजिजुर रहमान मुसब्बिरको मंगलबार राति गोली हानी हत्या गरिएको छ।
डेली स्टारका अनुसार ढाकाको कारवान बजारस्थित सुपर स्टार होटल नजिकै राति करिब साढे ८ बजे अज्ञात व्यक्तिले मुसब्बिरमाथि गोली प्रहार गरेका हुन्। ढाका महानगर प्रहरीका अतिरिक्त प्रहरी उपरीक्षक फजलुल करिमले मुसब्बिरलाई पन्थपाथस्थित बीआरबी अस्पताल लैजाँदै गर्दा मृत्यु भएको जानकारी दिए।
उक्त आक्रमणमा तेजगाउँ थाना वन श्रमिक युनियनका महासचिव सुफियान मसुद पनि घाइते भएका छन्। पार्टी सदस्यका अनुसार मुसब्बिर साँझ एक कार्यक्रममा सहभागी भई मसुदसँगै नजिकैको गल्ली हुँदै जाँदै गर्दा दुई जनाले गोली चलाएका थिए। आक्रमणकारीहरू पैदलै फरार भएका थिए।
घटनापछि स्थानीय बीएनपी कार्यकर्ताहरूले सोनारगाँउ चोक नजिकै विरोध प्रदर्शन गरेका छन्।
परिवारजन र पार्टी सदस्यका अनुसार मुसब्बिरले अवामी लिगको शासनकालमा लामो समय जेल जीवन बिताएका थिए र विभिन्न राजनीतिक मुद्दामा पटक–पटक पक्राउ परेका थिए।
फेब्रुअरी १२ मा तय भएको राष्ट्रिय चुनाव नजिकिँदै गर्दा हिंसा बढेपछि मोहम्मद युनुस नेतृत्वको अन्तरिम सरकारमाथि गम्भीर प्रश्न उठ्न थालेका छन्। यसअघि उस्मान हादीका परिवारजनले पनि चुनाव स्थगित गराउन उनको हत्या गरिएको आरोप युनुसमाथि लगाएका थिए।
