नेपालमा ४५ वर्षयताकै सर्वाधिक प्रि–मनसुन वर्षा, यस वर्ष ३३९.७७ मिमी रेकर्ड

चितवन, ०४ असार ।  नेपालमा यस वर्षको प्रि–मनसुन अवधिमा विगत ४५ वर्षयताकै सर्वाधिक वर्षा रेकर्ड भएको छ। जल तथा मौसम विज्ञान विभागका अनुसार देशभर औसत ३३९.७७ मिलिमिटर वर्षा मापन गरिएको छ, जुन दीर्घकालीन औसत २२६.३ मिलिमिटरको १४५.५ प्रतिशत हो।

विभागका मौसमविद् सञ्जिव अधिकारीका अनुसार पश्चिमी न्यूनचापीय प्रणाली, स्थानीय वायुको सक्रियता तथा अत्यधिक गर्मीका कारण यस वर्ष प्रि–मनसुन अवधिमा असामान्य रूपमा धेरै वर्षा भएको हो।

विभागले सार्वजनिक गरेको तथ्याङ्कअनुसार सन् २०२६ मा भएको ३३९.७७ मिलिमिटर वर्षा प्रि–मनसुन अवधिको हालसम्मकै उच्च रेकर्ड हो। यसअघि सन् १९९० मा ३३१.४० मिलिमिटर वर्षा भई उच्च रेकर्ड कायम भएको थियो।

त्यस्तै, सन् २००० मा ३२३.१९ मिलिमिटर, सन् २०२१ मा ३१७.८८ मिलिमिटर र सन् २०२० मा ३१५.७८ मिलिमिटर वर्षा भएको थियो। यस वर्षको वर्षाले ती सबै रेकर्डलाई उछिनेको विभागले जनाएको छ।

विभागका अनुसार औसतभन्दा उल्लेख्य बढी वर्षा हुनु जलवायु प्रणालीमा देखिएको परिवर्तनको संकेत हुन सक्छ। यस अवधिमा देशका विभिन्न क्षेत्रमा चट्याङ, हावाहुरी, असिना र भारी वर्षाका घटनासमेत बढेका छन्।

विभागले उपलब्ध अभिलेखका आधारमा यस वर्षको प्रि–मनसुन वर्षा हालसम्मकै उच्च रहेको जनाएको छ।