मल कालोबजारी गरेको आरोपमा पक्राउ परेकालाई जनही १० हजार जरिवाना तथा मल जफत गर्ने आदेश

चितवन , २८ भदौं ।
पूर्वीचितवनको रत्ननगर १ बकुलहरमा रहेको निर्मल बहुउद्देश्यी सहकारी संस्थाले मलमा कालोबजारी गरेको भन्दै संस्थाका चारजनालाई कारबाही गरिएको छ । कालोबजारी गरेको आरोपमा पक्राउ परेका संस्थाका व्यवस्थापक तथा खरिद बिक्री उपसमितीका ३ जना पदाधिकारीलाई जनही १० हजार रुपैयाँ जरिवाना तोकिएको छ ।

कालोबजारी मुद्धामा पक्राउ परेका  संस्थाका बिनोद अधिकारी , रामकृष्ण तिम्सिना , मायानाथ अर्याल र निर्मला घिमिरेलाई जिल्ला प्रशासन कार्यालय चितवनले जनही १० हजार रुपैयाँ जरिवाना तोकेको हो ।  जनही १० हजार जरिवाना र संस्थामा रहेको ५१ बोरा मल जफत गर्ने आदेश भएको जिल्ला प्रशासन कार्यालय चितवनका सूचना अधिकारी ईश्वर सिंखडाले समावेशी खबरलाई जानकारी दिए । जफत गरिएको मल सोहि क्षेत्रको किसानलाई उचित मूल्यमा विक्रीको लागि स्थानिय तहलाई दिने र विक्रीबाट संकलन भएको रकम राजश्व खातामा जम्मा गर्ने फैसाला भएको छ । त्यस्तै संस्थालाई कारबाहीको लागि स्थानिय तहलाई लेखी पठाउने आदेश भएको छ ।