जनतालाई तुरुन्त अनुभूति हुने काम गर्न सञ्चारमन्त्री तिमिल्सिनाको निर्देशन
चितवन, १४ चैत्र । डा. विक्रम तिमिल्सिना ले कर्मचारीलाई जनताले तत्काल अनुभूति गर्ने गरी परिणाममुखी काम गर्न निर्देशन दिएका छन्। मन्त्रालयको कामकारबाहीबारे जानकारी लिँदै उनले सञ्चार मन्त्रालय नागरिकसँग प्रत्यक्ष जोडिएको निकाय भएकाले छिटो, सरल र जनमुखी सेवा प्रवाहमा जोड दिन आग्रह गरे।
उनले नयाँ राजनीतिक परिवेश र जनताको उच्च अपेक्षालाई ध्यानमा राख्दै सरकारले जिम्मेवारीपूर्वक काम गर्नुपर्ने बताए। सेवा प्रवाहलाई छरितो बनाउँदै समस्याहरू आउनेभन्दा अघि नै समाधान गर्नुपर्नेमा उनले जोड दिए।
सञ्चारमन्त्री तिमिल्सिनाले मन्त्रालयलाई नमूना बनाउने लक्ष्यसहित तत्काल सुधारका कार्यक्रम र दीर्घकालीन योजना ल्याउन निर्देशन दिएका छन्। साथै ‘डिजिटल डिभाइड’ हटाउन द्रुतगतिमा काम गर्न, आवश्यक कानुनी सुधारका प्रस्ताव छिटो ल्याउन र जनतालाई राहत दिने कार्ययोजना तयार गर्न आग्रह गरेका छन्।
उनले समन्वय र सहकार्यमार्फत छिटो परिणाम हासिल गर्न सकिने उल्लेख गर्दै सबै कर्मचारीलाई जिम्मेवार र सक्रिय भएर काम गर्न निर्देशन दिए।
कार्यक्रममा मन्त्रालयका महाशाखा प्रमुखहरूले आफ्नो प्रगति, समस्या र आगामी योजना प्रस्तुत गरेका थिए। मन्त्रालयकी सचिव लक्ष्मीकुमारी बस्नेत ले सेवा प्रवाहलाई थप प्रभावकारी बनाउँदै दूरसञ्चार सेवा सुधारमा ध्यान दिने प्रतिबद्धता व्यक्त गरिन्।
