कतारका अमिरसँग उपराष्ट्रपति यादवको भेट, राष्ट्रपतिको समवेदनापत्र हस्तान्तरण
प्रकाशित मिति: बिहिबार, आषाढ ३२, २०८३ | १०:२९:१६
चितवन, ३२ आषाढ । उपराष्ट्रपति रामसहाय प्रसाद यादवले कतार भ्रमणका क्रममा दोहास्थित लुसाइल दरबारमा कतारका अमिर शेख तमिम बिन हमद अल थानीसँग शिष्टाचार भेटवार्ता गरेका छन्।
उपराष्ट्रपतिको कार्यालयका अनुसार पूर्वअमिर शेख हमद बिन खलिफा अल थानीको निधनप्रति नेपाल सरकार र नेपाली जनताका तर्फबाट श्रद्धाञ्जलि तथा समवेदना व्यक्त गर्न उपराष्ट्रपति यादव कतार पुगेका हुन्।
भेटका क्रममा उनले अमिर शेख तमिम, शाही परिवार तथा सम्पूर्ण कतारी जनताप्रति गहिरो समवेदना व्यक्त गर्दै यस दुःखद घडीमा धैर्य धारण गर्ने शक्ति प्राप्त होस् भन्ने कामना गरे।
यस अवसरमा उपराष्ट्रपति यादवले राष्ट्रपति रामचन्द्र पौडेलका तर्फबाट पठाइएको शोक तथा समवेदनापत्र अमिर शेख तमिमलाई हस्तान्तरण गरेका थिए। भेटवार्तामा नेपाली प्रतिनिधिमण्डलका सदस्य तथा कतारका उच्च अधिकारीहरूको पनि उपस्थिति रहेको थियो।
प्रकाशित मिति : बिहिबार, आषाढ ३२, २०८३ |
१०:२९:१६
309
सम्बन्धित समाचार
समाबेसी ट्रेन्डिङ
